Hakha le Falam Budget Tam Deuh Kong ah Ramkheltu le MP Cheukhat Lungtling Lo

| The Chin Journal | Hakha, Chin State

Chin ramkulh hluttaw nih Chinram chung peng pakua i Budget a tthenphawtmi kong he pehtlai in Chin ramkheltu le Hluttaw palai cheukhat lungtling loin an awaan an hun langhter.

May 4 ah Chin ramkulh hluttaw lakhruak meeting an tuah i, 2020-2021 tangka kum ramkulh budget fehternak le peng pakua budget tthenphawtnak an tuah.

2020-2021 phaisa kum i peng pakua budget an phawt ning cu hitihin a si:

Hakha peng – 31 billion; Thantlang peng – 12.5 billion; Tedim peng-14.9 billion; Tonzaang peng-9.5 billion; Falam peng-20.75 billion; Kanpetlet peng-9 billion; Matupi peng-20.08 billion; Mindat peng-13 billion le Paletwa peng-12.3 billion tiin an si, tiah Chin ramkulh hluttaw palai Salai Aung Lian nih a langhter.

Chin ramkulh vuancichoh khua Falam peng nih 20 billion leng le Chin ramkulh khualipi le acozah tthutnak Hakha peng nih 30 billion leng Budget an hmuhmi kong ah lungtlin lonak a um hi a si.

Micheu nih, “Chaklei Laitlang rumro papi nan pek i, Thlanglei Laitlang na kan philh. Ahlan in atu tiang Budget i ruannak um loin Chaklei Laitlang lawnglawng upavo nan pek,” tiah lungfahnak langhtermi tete zong a um len.

Chin ramkulh hluttaw palai tthing Mindat khuami U Aung Tann nih, “Chin ramkulh hluttaw palai pawl zong hi buaktlak tein khua an ruat lo. Hakha kan zoh a si ahcun Hluttaw Chairman umnak le Lamsul vuanci umnak a si. Anmah zungzal Budget tam bik an si i, zei cu dah kan chim len ko hnga. Falam cu vuancichoh le hluttaw palai Pu Ral Hnin an um fawn. A dang peng pawl ca ah zeihmah an chim ti lo annih cu. Hruaitu upa a ttuanmi nih theihthiamnak le zawnruahnak he tawlrel a herhmi pei a si cu,” tiah a chim.

CNLD Chairman U Ngai Sak nih, “Budget hi aa khat ngaingai in tuaktak awk cu a har ko lai. Peng chung rianttuan awk pawl zoh in Budget aa dang khomi a si ko. Asinain, kumchiarte Hakha le Falam zungzal Budget an tam deuh i, a dang peng pawl ca ah Budget a tlawm ngaingai. Hihi angai ah cun a si awk a si lo. Hruaitu a simi nih peng kip i an herhmi zoh in aa buaktlak tein rianttuan a herh. Abikin, a tthangcho deuh rih lomi hmunhma pawl kha upavo pek ding a si. Vuancichoh le Hluttaw Chairman an umnak peng pawl ah kumtin Budget a tam deuhmi hi chim ko ahcun i buaktlaknak a um lo ti khawh a si,” tiah a chim.

Chin ramkulh cozah chimnak nawlngei vuanci U Soe Htet nih, “Hakha cu ramkulh cozah zung thutnak hmun a si bantuk in, abiana ah, University sianginn zong kan sak, zaanglek lei inn zong kan sak, cun a dangdang lam le sul le zung kip i a herhmi inn pawl sak ding a tam. Cu ruang ah cun Budget aa dannak a si. Asianin, peng kip i Na Ta La rianttuannak Budget, Sipin Budget le Electric zung lei Budget tibantuk cu an i thlau tuk hna lo. Abikin, lamsul lei zung nih an ttuannmi lam meng zeitluk in a sauh timi cung ah hnget in Budget aa dan hi a si,” tiah a fianter.

Cherhchan: Khonumthung

 

Latest News

News in Burmese