Hakha Khuapi ah Inn Hi aa Tettawt Tuk in Kan Sak Ding a Si Lo: Pu Thla Hre

| The Chin Journal | Hakha, Chin State

Chin ramkulh, Hakha khuapi cu vawlei a feh lo caah innsak tik zong ah aa tettawk tuk in sak ding a si lo, tiah Chin ramkulh Sipin Director kum 5 a rak ttuan balmi Pu Thla Hre nih October 26, Yangon ah a chim.

Pu Thla Hre nih, “Hakha cu 2015 ah vawlei a rawk cangmi a si. Vawlei sining a theitu thiamsang pawl (Geologists) nih a kan timi cu inn hi aa tet tein tenh ti hlah u kan ti,” tiah a chim.

Pe 100 a kaumi innhmun ah inn thum tiang hna kan sakmi le vawlei kan cawhmi nih Hakha khua a rawhter tiah a chim chap.

“Thiamsang pawl nih pe 100 a kaumi innhmun ah inn pakhat lawng sa u. Inn thum te hna nansak, vawlei tibantuk nan cawhnak nih khua a rawhter tthan ti a si. Cucu thiamsang pawl nih a kan chimhmi a si. Khua hi a samh tu in kan i samh awk a si,” tiah a chim.

Cun, Hakha khuathar Pu Ral Hmung certual ah Shopping Mall sak ding kong he pehtlai in, “Khua pakhat aa dawh nakding ah cun a karlak ah hmun a lawngmi (Park/certual tbk.) cu a um hrim a hau. Cerhmun te hna cu a dang ah tuah tthan awk ah a fawi ti lomi si. Cucahcun, cerhmun tibantuk cu kan hrawh ding a si lo. Shopping Mall tibantuk saknak cu khualeng deuh, hmun a lawngmi ah a thar in kawl awk a si,” tiah a chim.

Latest News