Hakha Khuachung Dinti Peknak Tuanvo Latu Company Pawl a Zizut an Si Lai

| The Chin Journal | Hakha, Chin State

Tangka Ks. 2.9 Billion dih in tuahmi Hakha khuachung dinti peknak thla 6 chung ah rian lim ding a simi kum 2 a luan tiang aa lim lo ruang ah tuanvo latu KMDL Company le Moe-kok-shwe Company cu aa tlak ning in a zi kan zut hna lai tiah Chin ram cozah chimnak nawl ngeitu Minister Soe Htet nih a chim.

“Timit in Hakha khuachung an kaitermi ti hi Gallon 960,000 a si. Timit in Hakha khuachung tiang an kaitermi tu cu a tlamtling. Ti-inn in khuachung peknak caah 2.9 Billion dih in KMDL le Moe-kok-shwe nih an tuahmi hi design zong a hmaan lo, Layout plan zong a hman lo, Drawing zong a hmaan lo, pipe line pawl a hnok tuk caah ti pek khawh zong a si lo” tiah Minister Soe Htet nih The Chin Journal ah a chim.

“Cazin chek pawl an ca zong ka sin a phan cang. Hi cazin ning hin riantuantu pawl cu aa tlak ning in a zi kan zut hna lai. A herh le tangka kan liamter hna lai, a herh le minung zong a zi kan zut hna lai i upadi ning in tuah a herhmi poahpoah kan tuah lai” tiah a chim chap.

Khuachung ti peknak pipe line cu sipin committee hruainak in thiamsang pawl auh hnu ah a thar in remh than a si lai i a ran khawh chung in ti pek khawh kan zuam lai tiah Minister Soe Htet nih cun a chim chap.

Hakha khua dinti peknak rian cu aluancia 2014-2015 tangka kum ah 8.8 Billion dih in ser hram an rak thok. Timit in Hakha khuachung ti-inn tiang cu a phan kho cang nain, inn kip ti peknak rian belte nihin tian an lim kho rih lo tiah theih a si.

Latest News