Hakha Khua Sang Cheukhat Ti Har Ruang ah Zaan Ih Loin Khuadei Tiang Ti a Thanmi Zong an Um

| The Chin Journal | Hakha, Chin State

Hakha khua Chin-oo-sii sang ti har tuk ruang ah zaan hngilh loin khuadei tiang se-myaung tlang tikhor ah ti than a kalmi zong an um tiah sang minung pakhat sin in thawng kan theih.

Ti har tuk ruang ah ti thanmi an hun tam ngai i a changchang in than a si tawn. Khuachel ah a ting lomi zong an um i zaan khuadei a ngakmi zong an um hi a si.

“Atu hi, zaan ah ih lo bak in kan than, chun ah cun ti kan ngah ti lo. Zaan suimilam 12:00 hrawng in kan va kal i dei lei suimilam 3:00-4:00 hrawng ah inn kan rak tin” tiah Chin-oo-sii sang um Pi Tin Iang nih The Chin Journal ah a chim.

A hlan ah cun ti hi 5gallon phung 1 ah Ks. 250 in kan rak cawk tawn. Tu kum tu hi cu kan har tuk, ei le din zong a si rih. Cucaah kan i hne, zarh khat ah zaan 3 chung hi ti kan than. Zaan 12:00, 1:00 hrawng in kan va kal, 3:00-4:30 hrawng ah kan tin i khuadei hnu ah phung i kan rawn ciami cu kan thir tiah a chim chap.

Hi kong he pehtlai in Chin-oo-sii sang um min langhter lo nu pakhat nih “Kannih sang hi cu ti kan har ngaingai, ruah a sur caan i kan donhmi te lawng a si ko, a cheu cu Se-kiam (se-myaung thlang tikhor) ah an than hna. Ti cu kan har tuk ko, cawk cio a si ko, a dang cu a tingting hmanh in an cawk cio cang. Kannih zong thla khat Ks. 100,00 hrawng cu kan dih tawn” tiah a chim.

Chin-oo-sii sang thiamthaim a ummi Pi Dar Hliang nih “Ti hal chom in kan um, ka hrawnghrang ti tlawmpal a chuakmi tete kha kan hal hna. Kannih chung hi minung 9 khuasa kan si. Innpa ngamh tlak tete nih an kan thenh tawn, khuachel ah kan cawk. Eidin awk ngei lo deng tian in kan har, nizaan hna cu ti kan ngei ti lo i atu hi kan hal hna, rak than ve ko u an kan ti i atu hi kan than” tiah a chim.

Kum dang tawn zong ah Hakha khua hi ti a har zungzal. A bik in Chin-oo-sii sang a zual khun. Cozah tuahmi Timit dinti zong nihin tiang Hakha khuami nih ningcang in hman khawh a si lo, Hakha thar No.1 le No.2 sang lawnglawng nih Timit ti cu an hmuh.

Asinain, electric a rawh caan a um tawn caah ti lei harnak an ton caan a um theo. Nizaan nai zong electric a rawh caah ni 9-10 hrawng ti hmuh lo in an umnak kong Hakha thar  No. 2 sang khuabawi Pu Tawk Lian nih The Chin Journal ah a chim.

Latest News