Hakha-Hmantaw Lam Kan Cawhnak Aruang: VP Henry Van Thio

| The Chin Journal | Hakha, Chin State

An tuan cuahmah i an lim deng cangmi Hakha-Hmantaw lam cawh a sinak kong he pehtlai in Myanmar Vice President Henry Van Thio nih December 20 zinglei, Naypyidaw a inn ah Chin Media hna sin ah chimfiannak a ngei.

Chin ramkulh in Kawlrawn lei chuahnak ca ah kan hman bikmi cu Hakha-Kalay lampi (Meng 146) le Hakha-Gangaw lampi (Meng 80) hi an si.

Atu an ttuan cuahmahmi Hakha-Hmantaw lampi hi meng 66 leng furlong 7 lawng a saumi a si. Hakha in Sagaing ramthen chung Hmandaw ah le Magwe ramthen chung Taungkhayan (Hakha-Taungkhayan, Meng 68/2) tiang lam pemh ding in timhtuahmi a si.

Hi lampi an cawhnak kong he pehtlai in Vice President Henry Van Thio nih a tanglei bang in a chim:

“2015 leimimhnak lio ah khan harnak fak tuk in kan rak tong. Tu hnu ah lihninhnak tibantuk chuak sual sehlaw hma a ngei cangmi Hakha-Gangaw lampi hi fawilebai in kan remh kho te hnga maw? Leimimhnak a rak chuah lio ah khan motor lam a tthat ti lo caah Lungcawi in kan kee in ni thum chung kan rak kal. Cucaah, atu kan hmanmi lam pawl an rawh sual ah lamdang pakhat hi ngeih kan herh hrimhrim tiah Vice President rian ka tlaih hlan tein saduh ka rak thah ciami a si,” tiah a chim.

Hakha-Hmantaw lam hi Hakha-Tiphul-Rinpi-Rinte-Haiphai-Haltha khua pawl tan in Kawl rawn lei ah a vung tla ding a si.

Hakha-Hmantaw lam le Hakha-Taung Khin Yann lam zohchunhnak Map| Google Earth

“Hakha-Hmantaw lam ttuan a si kaa ah abiapi in kan tuakmi cu a pakhatnak ah hi lam hi khualtlawnnak ah ttihnung a si lai lo; a pahnihnak ah a fekmi lam a si lai; a pathumnak ah lam zoh tik ah aho khua/mithmai zoh loin kan ttuan lai kan timi a si,” tiah a chim chap.

Hi lam a pem hin cun Sagaing ramtthen le Magwe ramtthen ah facang a chuah biknak a simi Hmantaw, Hanthawaddy le Tuang Khin Yann ah Laitlang lei in facang fawi tein kan phir khawh lai.

Hi lam hi 2020 chung ah tlamtling in pemh khawh ding in ttuan cuahmah a si, tiah Vice President Henry Van Thio nih a chim.

Chin ramkulh tthanchonak rian kong he pehtlai in Vice President Henry Van Thio nih a chimmi tampi an um rih i pehzul in kan rak tar lai.

Latest News