Hakha College Quarantine Kong Pu Cia That Chim Ning Loin Media nih an Tial Caah Fianternak a Tuah

| The Chin Journal | Hakha, Chin State

Hakha College ah a rak ummi Quarantine hna an tthutdir ning kong he pehtlai in Pu Cia That nih bia a chim ning lo piin Laitlang hrambunh Media cheukhat nih a bia an merhpiak i an ttial ruang ah Pu Cia That  nih pumpak in fianternak a ngeih.

Pu Cia That cu Hakha khua, Dillo sang ah a ummi a si i Case – 150 he aa naihniammi a si caah Hakha College ah Quarantine in ni 21 chung a rak um vemi a si.

Hakha College ah chiahmi Quarantine minung 48 cu May 20 ah inn ttinnak nawl pek an si i, Pu Cia That zong inn ah um ve cang.

Nizan Quarantine in a chuah lio zong ah khan Media nih a bia lo ning in an ttialmi kong a chim cang i nihin ah The Chin Journal sin zong ah a chim tthan.

Hakha College Quarantine an rak chiahka hna ah khan Pu Cia That biachimmi cu Laitlang hrambunh Chin Media cheukhat nih, “Hakha College Quarantine pawl tthutdir ning a tlamtling ko. Asinain, acozah thawng in a si lo,” tiah an rak merh i an langhter.

Pu Cia That nih, “Mah ka chim lio ah khan Chief Minister le  Hluttaw Chairman zong an um ko. Nan sinpi maw a kan ti i, atu cu kan sinpi ko cang, acozah bawmhnak lawng in si loin a lenglei bu tete le ramchung ramleng le Khrihfabu kip in bawmhnak a kan pek i kan tlamtling tiah ka timi a si,” tiah a chim.

“Acozah bawmhnak LAWNG in a si lo” tiah a timi kha Media cheukhat nih, “Acozah bawmhnak THAWNG in a si lo” tiah an merh tik ah sullam dang piin a chuak.

Pu Cia That nih,”Acozah bawmhnak lawng in a si lo tiah ka timi kha acozah bawmhnak thawng in a si lo tiah an kan tipiak. Hluttaw Chairman a um, Chief Minister zong a um. Anmah hmaika bak i ka chimmi kha an van lak i acozah bawmhnak thawng in a si lo ti bak in an rak chuah cuh,” tiah a chim chap.

A cunglei bantuk in bia merhpiak in a ttialtu Media pawl zong Pu Cia That nih pumpak in a chawnh hna i ka remhpiak u, asiloah, keimah nih ka ttial lai i ka tarpiak tthan u a ti hna nain atu tiang an remhmi ka hmu rih lo, tiah Pu Cia That nih a chim.

“Media zong nih thawng lak tik ah ttha tein le hmaan tein lak i, mizapi ca zong a ttha ding le acozah ca zong ah a ttha ding in i zuam ding a si. A si khawh cun hmaitonh tein tlamtling te le fiang tein rak kan hal hna sehlaw ttial hna sehlaw a ttha hnga. Hmailei ah hi bantuk pawl zong hi kan va tong hraw ti lai lo. Cattial tik belte ah i ralrin ngaingai ding a si,” tiah Pu Cia That nih a lungsiaherh bia a chim chap.

Latest News

News in Burmese