Hakha CDM a Tuahmi Chungkhar Cheukhat Khuasak an Harsa

| The Chin Journal | Hakha, Chin State

Van Van & Min Cung | Ralkap uknak duhlo ruang ah acozah zung rian chuahtak chung in thlahlawh loin CDM a tuahmi Hakha khua i chungkhar cheukhat harsa le lungrethei in an um hna, tiah The Chin Journal nih biaruahnak kan ngeihmi hna chung in kan theih.

Hakha cu Chin ramkulh khuapi a si bantuk in acozah zung rianttuantu an tam biknak zong a si i, zung rianttuantu 90% leng CDM ah an i tel hna.

CDM a tuahmi zung rianttuan nu pakhat nih, “CDM bawmhnak hi March 15 ah khan voi khat 50,000 MMK kan hmu. Hmailei kan hmuh tthan lai le hmuh tthan lai lo kan thei lo. Kannih hi lahkhah bak a tomi kan si i, hmailei khuasaknak ca ah kan harsa ko lai nain kan pa hi a dam paoh ahcun a kan cawm khawh ko lai,” tiah a chim.

Hakha CDM a tuahmi minung zeimawzat biahalnak kan ngeihmi hna chung ah CDM bawmhnak hi voi khat 50,000 cu kan hmu cang tiah mi tam deuh nih an chim.

Micheukhat cu anmah tein khuasak loin nulepa sin ah aa fonh chungmi zong an um hna.

A fale pahnih CDM a tuahmi upa pakhat nih, “Kan fale pahnih CDM an tuah tik ah thlahlawh an hmu ti lo. Sihmanhsehlaw, atu tiang cu chambau tuk in kan um rih lo. CDM bawmhnak an pek timi kan theih ko nain atu tiang cu kanmah va kal in kan pehtlai hna lo,” tiah a chim.

Annih hi chungkhar minung 6 khuasa an si i, thlahlawh an hmuh ti lo pin ah CDM bawmhnak zong hmuh loin an um i, hmailei an khuasaknak ca ah zeidah an ton lai timi a fiang lo ngaingai.

Asinain, hringtu pa bik nih, “Atu ralkap uknak hi mino hna nih nan tei hrimhrim a hau. Hnu ah kir hrim hlah u, hmai ah fong chih ko uh. Fimzer tein um u law nan hmailei khuacuan uh,” tiah forhfialnak bia a chim.

Hringtu a nu CDM a tuahmi Hakha tlangval pakhat nih, “Ralkap nih uknak an lak tik ah ka nu zong CDM a tuah ve. Thlahlawh a ei ti lo tik ah kan khuasak a har deuh ngai. Ramdang lei kan ule nih a kan kuat lo cun ei ding kan ngei lo ti tluk a si. Cucaah, ka nu zong chungkhar ei ding kawlhawlnak ca ah zinglei ah tisik anhnah a zuar,” tiah a chim.

CDM a tuahmi bia kan ruahmi hna lak ah micheukhat nih CDM bawmhnak kan hmu lo a timi an um len. Bawmhnak voi khat 50,000 kan hmu a timi zong an um bang in bawmhnak voi 2, 50,000 veve in kan hmu a timi mi tlawm u zong an um ve hna.

Hakha khuachung i sang le Khrihfabu cheukhat nih an sang chung le an Khrihfabu chungtel chung in CDM a tuahmi pawl bawmhnak tlawmpal cio pek ding zong in timhtuahnak an ngei hna, tiah kan theih.


Chinchiah: A cunglei Hakha CDM tuahmi chungkhar khuasaknak kong hi Hakha The Chin Journal reporter pahnih i bawm in March 15-17 karlak ni 3 chung CDM a tuahmi pawl biahalnak kan tuahmi hna chung in kan rak langhtermi a si.

Latest News

News in Burmese