Hakha ah Yangon in a Rak Tlungmi Pa Sin in COVID-19 Zawtnak an Hmuh

| The Chin Journal | Hakha, Chin State

Yangon in Hakha ah a rak tlungmi pa pakhat sin in COVID-19 zawtnak an hmuh, tiah thawng kan theih.

Hi COVID-19 mizaw pa hi Hakha lamsul lei zung ah Tender sok ding in November 3 ah Hakha ah a rak phan i, GTI ah Quarantine an chiahmi a si.

November 4 ah a Swab cu Mandalay an kuat i nihin ah COVID-19 zawtnak a ngei tiah an fehter.

A cunglei COVID-19 mizaw cu Hakha Taingyinse sizung ah an chiah i, atu ah cun Hakha Taingyinse sizung ah COVID-19 mizaw pahnih an um tthan cang.

A dang mizaw pa zong hi Yangon ramtthen Hmawbi khua i Otober 19 ah Hakha ah a rak phanmi a si i, October 27 ah COVID-19 zawtnak a ngei tiah an hmuh caah sizung ah an chiahmi a si.

“Hmawbi in a rak tlungmi COVID-19 mizaw pa hi a sining a ttha ko. WHO nih a langhter bang in COVID-19 zawtnak hi ni 11 hnu cun mi a chawn kho ti lo, amah thih in a thi. Asinain, zawtnak an ngeih lio ni 11 chung hi ttha tein zohkhenh an herh. Hmawbi in a rak tlungmi pa zong hi ni 11 hnu cun inn ah kan ttinter lai i, ni 7 chung inn ah aa erh rih lai,” tiah Hakha COVID-19 Positive Center ah ttuanvo ngeitu a simi Dr. Kaung Thu Naing nih The Chin Journal ah a chim.

COVID-19 a voi hnihnak a hun chuah tthan hnu ah Hakha ah COVID-19 mizaw 8 hmuh an si cang i, cu chung ah cun atu tiang ah minung 6 nih damnak an hmu cang.

Latest News

News in Burmese