Hakha ah Kum (4) Ngakchia Motorcycle nih a Pah i a Nunnak a Liam

| The Chin Journal | Hakha, Chin State

Hakha khua ah kum (4) ngakchia pate motorcycle nih a pah i, a pahtu pa cu a zaam, tiah thawng kan theih.

May 7, zaanlei sml. 6:00 hrawng ah khan ngakchia pa le a nulepa cu Hakha khuavelnak lam ah motorcyle mongh cawn ding in an kal hna.

Motorcycle cit an cawn lio ah cun aho si timi an theih rih lomi minung pakhat nih motorcycle in ngakchia pate cu a pah i, cu pa cu dir loin a zaam.

Ngakchia pate hi Peter Biephasa tiah auhmi a si i, Thantlang peng, Lailen khuami Pu Cau Bik le Pi Ngun Za Iang i a fapa a si i, Hakha khua, Chin Oo-sii ah khua a sami an si.

Hi kong he pehtlai hin Hakha palik zung ttuanvo ngeitu pakhat nih, “Atu tiang cu motorcycle in a pahtu pa hi kan tlai kho rih lo. Chungkhar zong nih a pahtu pa hi a mui an hliah lo. Tlaih khawh ding in hlathlainak kan tuah cuahmah lio a si ko,” tiah The Chin Journal ah a chim.

Ngakchia pate hi sizung an phakpi ko nain a lu ah fak tuk in aa khawn caah cu a tuarhma cun a nunnak a liam i, a ruak cu nihin chun sml. 11:30 ah an vui, tiah thawng kan theih.

Latest News

News in Burmese