Hakha ah Facang an i Cawk Cia Hna, Lam a Pit Lai tiah an Ruah

| The Chin Journal | Hakha, Chin State

Kawl ralkap uknak a lak ni February 1 ah Hakha khuachung ah mi tampi nih facang an i cawk cia hna, tiah thawng kan theih.

Pyidawtha sang ah cun facang dawr cheukhat ah facang cawk awk um loin a dih, tiah Pyidawtha ah dawr a tuahmi nutung pakhat nih a chim.

“Nizan cu facang hmanh (Dawr cheukhat) ah a dih. Ral a tho lai tiah an ruah i an ttih. Kei ka caw lo, facang a dih. Laimi cu COVID-19 lio zong ah khan kan rak i cawk cia dih. Ka lau ko,” tiah The Chin Journal ah a chim.

Khuathar khua a sami pastor pakhat nih nizan kha cu an i cawk cia len hna i, lam a pit lai tiah an ruah i dawr ngei cheukhat nih cun thil man kaiter an timh, tiah a chim ve.

“Nizan ralkap nih uknak an lak i, Internet le Phone line pawl an phih dih ah khan facang an i cawk cia hna. 1988 lio bantuk khan a si lai tiah an ruah i si lai. Dawr ngei cheukhat zong lam a pih sual ah an ti i thil man kaiter a timmi an um ve. Asinain, atu cu Internet le Phone line an on tthan cang i nizan bantuk cun a si ti lo,” tiah a chim.

Pyidawtha ah dawr a tuahmi nu nih cun hi bantuk har kan ton caan ah thil man kaiter kan timhmi le hawi dang thingzo lo ding tiang in thil cawk cia kan hmanmi lungput hi kan i remh a hau, tiah a chim.

“2015 i Hakha mincimh lio le COVID-19 zawtnak a chuahka lio zong ah Laimi cu thil man kaiter le thil cawk cia dih kan hmang. Kan lungput bak hi remh kan hau. Kei zong dawr ka tuah nain ka hawile he thil man kan kaiter lai lo tiah kan ti. Ka dawr hi a fate a si ko nain ka cah ciami thil man pawl cu ka kaiter lai lo,” tiah a chim.

Hakha lawng ah si loin Thantlang khua zong ah ralkap nih uknak a lak ni ah facang aa cawk ciami an tam ngaingai tiah Thantlang ah facang dawr a tuahmi Daw Ni nih a chim.

Bank pawl zong an khar dih lai tiah an ruah caah nizan February 1 cu bank ah tangka a chuahtu minung an tam ngaingai.

Asinain, Kawlram chung tangka chuahnak bank hi khoika hmanh ah khar a si lai lo tiah ralkap nih February 2 ah thawng an thanh.

Latest News

News in Burmese