Hakha ah COVID-19 Phung a Ngai Lomi Minung 4 Ralrin Pek an Si

| The Chin Journal | Hakha, Chin State

Cozah lei nih thawng an rak thanh cia bantuk in nihin April 27 thawk in Hakha ah COVID-19 runvennak kong he pehtlai in mizapi checknak biatak tein tuah hram an thawk i minung 4 cu ralrin an pek hna.

Nihin thawk in Mask aa huh lomi hna le a herh huaha lo ah leng ah aa chokmi paoh cu dantatnak tuah an si lai tiah thawng an rak thanh cang.

Cu kong he pehtlai cun April 23-24 kha fimchimhnak caan tiah an rak ti i, acozah nih Hakha khuachung lampi ah mipi fimchimh cawnpiaknak zong tuah a rak si.

Nihin zinglei ah Hakha Khuathar, Falam le Thantlang lei pialnak lamton ah vuanci Pu Sui Thio nih a telpi hna i checknak an tuah cuahmah.

Nihin checknak hi chun sml. 12:00 ah an i din ta lai i, zanlei sml. 3:00 in an thawk tthan lai i zanlei sml. 5:00 tiang a si lai.

Nihin zinglei checknak i sml. 9:30 tiang ah khan minung 4 cu COVID-19 phung an buar caah mincazin an lak hna i ralrin an pek hna. Nehhnu ah phung an buar tthan ah cun tlaihkhih le tazacuai an si lai.

Latest News

News in Burmese