Hakha khua ah Kawlrawn lei in a rak tlungmi minung 6 sin in February 16 ah COVID-19 zawtnak an hmuh, tiah thawng kan theih.
Gangaw lei Hakha khualuhnak ah minung 15 an check hna i nu pakhat le ngakchia pakhat telh in minung 6, COVID-19 zawtnak an ngeihmi an hmuh hna hi a si.
“Mandalay khua in a rak tlungmi minung pahnih le Pakhuku lei in a rak tlungmi minung 4 sin in zawtnak kan hmuh,” tiah ttuanvo ngeitu pakhat nih a chim.
COVID-19 mizaw thar paruk cu thlopbulnak ngeih ding in Hakha Taingyinse sizung ah an chiah hna.
Ralkap nih uknak a lak hnu ah Myanmar ramchung ah lamzawhnak le buaibainak tampi a um ko nain COVID-19 runvennak cu khua kip luhnak Check Point pawl ah pehzul in tuah a si.
