Hakha ah a Rak Lutmi Motor Mongtu le a Hnuzul Pawl Zawtnak Check Hram an Thawk

| The Chin Journal | Hakha, Chin State

Hmun dang in Hakha khua ah a rak phanmi motor mongtu pawl le motor hnuzul pawl COVID-19 zawtnak an ngeih le ngeih lo checknak cu October 9 ah khan Hakha ah an thawk ve cang, tiah thawng kan theih.

Hakha khualuhnak lamkam in ngandamnak zung, palik le uknak lei zung tibantuk i bawm in an hngah hna i, motor mongtu le a hnuzul pawl i an Swab an lak hnu ah an check hna.

Checknak hmun ah zawtnak a ngeimi an hmuh hna a si ahcun Hakha Sizungpi ah thlopbulnak tuah ding in kuat an si lai.

Zawtnak a ngei lomi pawl cu zawtnak an ngei lo timi catlap pek an si i, khuachung khualeng zatlong in luhchuahnak nawl pek an si.

Chin ramkulh chung Mindat, Tedim le Tonzaang tibantuk ah cun COVID-19 mizaw tam nawn an um nain atu taing Hakha ah cun minung 2 lawng an um rih.

Ahmasa zawtnak an hmuhmi nu cu damnak a hmu tthan i sizung in a rak ttuam cang.

October 10 ah Kawlrawn lei in a rak tlung i, Hakha Ingdwinhmuh ah Quarantine an chiahmi naungeihtertu sayama pakhat sin in COVID-19 zawtnak an hmuh i Hakha sizungpi ah an thlopbul lio a si.

Atu tiang Chin ramkulh chung ah COVID-19 mizaw 47 hmuh an si cang i, mi tam u nih damnak an hmu tthan cang.

Latest News

News in Burmese