Haiti Rampi President a Thattu Pawl an Tlaih Hna

| The Chin Journal | Hakha, Chin State

North America vawleitthen chung ah a ummi Haiti rampi President a thattu minung 28 cu July 8 ah an tlaih hna, tiah theih a si.

July 7 zinglei sml. 1:00 hrawng ah Haiti ram khualipi Port-au-Prince khua ah a ummi President inn ah meithal aa kenmi mibu an lut i, President Jovenel Moise (kum 53) le a nupi cu meithal in an kah hna.

Thah a tongmi Haiti President Moise

President Moise cu meithal kuan 12 in an kah pin ah a mitlung pakhat zong an khoih i a nunnak a liam. A nupi Martine cu hliamhma a pu i Florida sizung ah an thlop hnu ah nunhim in a um.

President Moise a thattu minung 28 an tlaihmi hna chung ah minung 15 hi Columbia rammi an si i, a dang minung pahnih hi US citizenship a ngeimi Haiti rammi an si hna.

Haiti Prime Minister Claude Joseph nih, “President Moise hi kan ramchung ziknawh eihmuarnak pawl fak piin a dotu a si. Cu ruang ah cun thah a ton hi a si kho,” tiah BBC ah a chim.

Haiti President a thattu pawl an tlaih hna lio

Atu tiang ah zei ruang ah dah President Moise thah a ton timi fiang in theih a si rih lo.

Mithattu bu nih President Moise inn an luh hnawh lio ah hin angki nakmi an i hruk hna i US FDA kan si,” tiah an hlen hna.

President inn ah rian a ttuanmi minung pahnih an tlaih hna hnu ah President Moise le a nupi an kah hna hi a si.

President Moise i a fale pahnih Jovenel Jr and Joverlein cu an i thup kho i, nunhim in an um tiah BBC nih a langhter.

Mithattu hi minung 28 nak tam an si i, a dang a zaammi pawl tlaih khawh ding in an hlathlai cuahmah lio a si.

Latest News

News in Burmese