Gangaw Peng Laica Chimtu Saya/ma 13 Caantling Saya Rian an Pek Hna

| The Chin Journal | Hakha, Chin State

Gangaw peng chung ah Laica (Hakha) a chimtu saya/ma 13 cu atukum thawk in Gangaw peng fimcawnnak zung nih caantling acozah sianginn saya/ma rian a pek cang hna, tiah thawng kan theih.

Caantling saya/ma rian pek ding in minung 15 timhtuah a si nain minung 2 hi degree an laknak certificate an hmuhsak manh lo caah caan nih a liamtak hna i hmaikum ah an tawlrelpiak than hna lai.

Gangaw peng Chinmi zatlang bu ah hruaitu a simi Rev. Tial Kem nih, “Acozah sianginn ah Laica a chimmi saya/mate hi an zapi ah minung 41 an si. Thla khat 120,000 an rak pek hna. Cu minung 41 chung ah cun atu minung 13 hi caantling acozah sianginn saya/ma ah lak an si. Primary an chim ve lai i caanhlei in Laica an chim lai. Caanhlei in Laica an chimhmi man cu thla khat ah a dang tein 30,000 pek chap an si lai,” tiah a chim.

Gangaw peng chung acozah sianginn 24 ah 2017 thawk khan Laica chimtu saya/mate an rak chiahpiak cang hna.

CACC zong nih Gangaw peng Laica chimtu saya/mate cu Laica chimh ningcang cawnpiaknak a ngeih tawn hna. April 2019 zong ah khan CACC nih Gangaw ah cawnpiaknak a rak ngeih hna.

A cunglei saya/mate nih hin Gangaw peng chung sianginn 24 ah a kaimi siangngakchia 1500 leng kha Laica an chimh hna.

Siangngakchia zakhat an umnak sianginn ah Laica chimtu saya pakhat, 200 an umnak ah saya pahnih tibantuk in acozah nih a chiah hna.

Latest News