Gangaw Khrihfa Pawl Lung in a Dengtu Kawl 9 Cu Inntek Khrihfa Pa Nih a Ngaihthiam Hna

| The Chin Journal | Hakha, Chin State

Gangaw peng, Pawlay khuate ah Khrihfa aa pum liomi pawl lungtum in a dengtu Kawl Buddhist minung 9 cu Khrihfa inntek pa nih a ngaihthiam hna, tiah thawng kan theih.

December 17, 2018 ah khan thaizing Christmas puai sunglawi tein tuah a timmi Pawlay khua Khrihfa minung 20 hrawng cu U Wa Daung inn ah pumhkhawmhnak an ngeih lio ah Buddhist pawl nih lenglei in lung in an rak cheh hna.

Lung in an cheh hna ruang ah taang 8 ngakchia nute le Pastor Myint Naing cu sizung ah an phan i a dang pahnih zong hliamhma an rak pu.

Lung in a cheptu Kawl Buddhist pawl cu inntek U Wa Daung nih taza a cuai hna i minung 8 palik nih an tlaih khawh hna. A dang pakhat a zaam.

Caan karlak chung ah Khrihfa pawl lung in a cheptu lei nih U Wa Daung cu nawlnak an rak tuah i U Wa Daung zong nih ngaihthaimnak minsen a thutpiak hna.

Asinain, sizung ah a phanmi minung 4 sin ah nawlnak an tuah rih lo caah biaceih zung nih an case cu a dihdonghter rih lo.

“U Wa Daung nih a ngaihthiam ko hna nain hliamhma a pumi minung 4 sin ah ngaihthiamnak an hal rih hna lo caah an case hi a dih rih lo. Nizan May 7 ah biaceihnak tuah a si than i hliamhma a pumi minung 4 nih kan ngaihthiam hna tiah minsen an thut ve lawng ah an case hi dihdonghter a si lai tiin biaceihbawi nih a chim i May 20 khi biaceih zung chuah than ding in auh an si,” tiah Magwe ramthen sihnipi Pi Van Ni Dim nih The Chin Journal ah a chim.

Pawlay khua ah Pastor a tuanmi saya Thla Nawl nih, “Inn ngeitu nih cun a ngaihthiam cang ko hna. Asinain hliamhma a pumi chung ah kan ngaithiam hna lai lo, thong va tla ko hna seh a titu zong an um. Kannih tu nih cun hmailei ah Khrihfa biaknak puai siseh, zatlang chiat-that puai zong ah siseh hnahnawhnak kan in pe ti hna lai lo tiin biahrennak le minsen thutnak an ngeih ahcun kan ngaihthiam ve ko hna lai,” tiah a chim ve.

Cun, lung in an cheh ruang ah a rawkmi thilri vialte man le hliamhma a pumi hna lungtling in liamrulhnak an tuah chap a hau lai, tiah saya Thla Nawl nih a chim chap.

Latest News