FIFA Thiam Bik Laksawng Caah Van Dijk Nih Messi Vote a Rak Pek

| The Chin Journal | Hakha, Chin State

The Best FIFA Player Awards timi vawleicung bawlungchuih thiam bik laksawng peknak cu a hun dih cang i thiam bik laksawng hmu ding in vote an pekmi cazin an zoh tik ah mi tampi nih Liverpool Laikham Van Dijk upat loin an um kho lo.

“Nizan ah The Best FIFA Men’s Player Award hmuh hlah hmanh sehlaw lungthin dawh a ngeitu Van Dijk” tiah thangthat le hlorh a tong.

The Best FIFA Men’s Player Award ca ah thimchungmi/nominees hna Messi, Ronaldo le Van Dijk hi an ram National Football Team zong ah Captain an si caah The Best FIFA Men’s Player Award peknak vote thlaknak nawl an ngei ve.

Messi, Ronaldo le Van Dijk nih The Best FIFA Men’s Player Award ca ah an duh bikmi minung pathum vote an pek ve hna.

Van Dijk nih The Best FIFA Men’s Player Award ca ah number pakhatnak ah vote a pekmi cu Messi hi a si.

UEFA Best Player Award 2019 hmanh ah amah he Top 3 cazin ah a ummi Messi kha Van Dijk nih atu bantuk in FIFA Best Player co ding in vote a pek tik ah mizapi nih upat loin an um kho lo.

Liverpool Laikham Van Dijk

Messi, Ronaldo le Van Dijk nih The Best FIFA Men’s Player Award ca ah vote an thlakmi hna cu a tanglei bantuk hin a si:

Van Dijk Vote – (1) Messi (2) De Jong (3) Mbappe. Messi number 1 ah a chiah, Ronaldo bel a telh lo.

Ronaldo Vote – (1) Marney (2) De Jong (3) Mbappe. Messi le Van Dijk a telh hna lo.

Messi Vote – (1) Marney (2) Ronaldo (3) De Jong. Van Dijk a telh lo i Ronaldo number 2 ah a chiah.

Messi nih The Best FIFA Men’s Player Award a lak lio

Messi, Ronaldo le Van Dijk nih vote an hmuhmi zapi zong an langhter: Messi – 377 votes; Van Dijk – 337 votes; Ronaldo – 330 votes tiin an hmu hna.

The Best FIFA Player Award 2019 laksawng peknak cu Italy ram, Milan khua ah nizan ah an tuah i Messi nih kum khat chung pa bawlungchuih thiam bik a co i, kum khat chung nu bawlungchuih thiam bik ah US rammi Megan Rapinoe nih a co.

The Best FIFA Men’s Player Award hi 2016 le 2017 ah kum 2 pehzul in Ronaldo nih a rak co. Cun, 2018 ah Modrid nih a rak co i atu 2019 ah Messi nih avoi khatnak a co a si. Atutan laksawng telh in FIFA nih pekmi vawleicung bawlungchuih thiam bik laksawng paruk Messi nih a co cang.

Vawleicung mizapi nih i hngahlang ngeimi Ballon d’Or Award peknak puai cu December 2019 ah an tuah te lai. Hi laksawng ca zong ah hin Messi, Van Dijk le Ronaldo thotho hi alarmi an si.

Latest News