NLD cozah chan ah European Union (EU) nih Myanmar palik cawnpiaknak program a ngeihmi cu Myanmar ralkap nih uknak a lak hnu in an ngol, tiah theih a si.
“February 1 Myanmar ralkap nih rampi nawlngeihnak a lak i Myanmar ram democracy dothlennak rian hnahnawhnak a pek caah Myanmar palik cawnpiaknak program kan ngol chung,” tiah EU nih cathanh a chuah.
EU nih Myanmar palik cawnpiaknak program hi Daw Aung San Suh Kyi le NLD cozah nih 2016 ah EU he biaruahnak an rak ngeih hnu ah an thawkmi a si.
Ralkap nih uknak a lak i, Myanmar democracy dothlennak ah hnahnawhnak fak piin a pek pin ah Myanmar palik pawl nih meithal kuan taktak hmang in ruru hranghrang in lamzawhtu mibu an tthentthek hna ruang ah atu bantuk in EU nih a program a ngol hi a si.
“Ram pakhat ningcang tein upadi kilkawi nakding ah nuhrin covo a upatmi palik bu ttha tein sersiam hi abiapi tukmi a si. EU nih cu bantuk lei cawnpiaknak cu Myanmar palik sin ah kan pek hna. Asinain, Eu nih Myanmar palik sin ah ralhriam lei bawmhnak zeihmnah kan pekmi a um lo,” tiah cathanh ah an langhter chih.
