Ecuador Ram Lamkam ah COVID-19 in a Thimi Ruak 100 Leng an Char

| The Chin Journal | Hakha, Chin State

South America ah a ummi Ecuador ram i lamkam ah COVID-19 zawtnak in a thimi miruak a tlawm bik 150 hrawng an char, tiah theih a si.

Miruak an charnak hmun hi rilikam ah a ummi Guayaquil timi khua ah a si i, micheu cu sii-inn hmaika ah a thimi zong an um.

Mithi an charmi ruak pawl cu khuami nih online ah an hun tar hnu ah Ecuador vice president Otto Sonnenholzner nih nawlnak a tuah.

“Kan zatlang ah a can awk a si hrimhrim lomi thil sining a langhtertu hmanthlak pawl online ah kan hmuh. Rak kan ngaithiam hram u tiin kan in nawl hna,” tiah vice president nih a chim.

Mithi ruak pawl cu thinginn ttha tein tuahmi ruakuang si loin caku bawm in sermi kuang pawl in an rawnmi hna zong an um.

Ruakuang dawr ngeitu pa Santiago Olivares nih, “Ruakung 40 a taangmi ka zuar dih cang. Mipi nih an herh ning in ruakuang kan serchuah kho ti lo,” tiah a chim.

Ecuador ram ah COVID-19 zawtnak a ngeimi 3,646 an um i, minung 180 an nunnak a liam, tiah Ecuador cozah nih thawng a thanh.

Ref: Daily Mail

Latest News

News in Burmese