Dr. Hrang Kil Te Paruk Kum (7) Thongthlak Khawnak Pohma in Taza an Cuai Hna

| The Chin Journal | Hakha, Chin State

Hakha khua, Cawkbuk sang i Hakha khuasamhnak hmun chung ah innhmun phungning loin an zuar ti ruang ah palik nih nihin September 9 ah tlaihmi Dr. Hrang Kil telh in minung paruk cu kum (7) tiang thongthlak khawhnak pohma in tazacuai an si, tiah theih a si.

Taza a cuaitu hi Hakha Administration zung uktu chang a simi U Tint Wai a si i, mipi (cozah) ngeihmi thilri/chawva ningcang loin hmannak upadi pohma 6 (1) in taza a cuai hna.

Mipi ngeihmi thilri/chawva ningcang loin hmannak upadi pohma 6 (1) cu 1947 ah an rak serchuahmi a si i, mipi (asiloah) cozah ngeihmi thilri/chawva a firtu, ningcang loin a hmangtu, a hrawkhraltu, mah pumpak ta bantuk in phungning loin aa chiahtu hna cu a tam bik thong kum (7) thlak khawh an si lai tiah aa tial.

Nihin zinglei ah khan palik nih Pu Zung Mang, Pu Bawi Awr, Pu Chan Thling, Rev. Dr. Hrang Kil, Pu Hmet Al le Pi Ngun Par cu palik zung ah an hruai cang hna.

“Suimilam 24 chung lawng palik zung ah hren chungnak nawl kan ngei i atu ni ah biahalnak kan tuah colh hna lai. Anmah he aa pehtlaimi minung tampi zong biahal ding an si caah caan sau cu a rau lai. Thla khat chung ah lim khawh ding in kan i zuam lai,” tiah Hakha palik sakhaam hmu U Thein Zaw Oo nih a chim.

Tuan deuh ah Chin ramkulh cozah nih vawlei ningcang loin a zuartu hna tiin cazin ah an rak i chiahmi minung (10) cu: (1) Dr. Hrang Kil (2) Pu Hmet Er (3) Pu Chan Tling, (4) Pu Mang Hleih (5) Pu Hrang Kep (6) Pu Thla Cung, (7) Pu Tial Lian Hmung (8) Pu Uk Te (9) Pu Chan Hram (10) Pu Tial Mang hna hi an si.

Nihin an tlaihmi hna lak ah Dr. Hrang Kil, Pu Chan Tling le Pu Hmet Er lawng hi a cunglei minung (10) lak ah an i tel.

“Vawlei ngeitu sinak tehte ngeih loin acozah vawlei an zuar. Nehhnu kan check tik ah hi minung (6) hi an si tiah kan hmuh hna. A dang kong ah zeitin thil a si ti ka thei ve lo,” tiah vuanci U Soe Htet nih a chim.

-Zalen

Latest News