/

Dr. Hmuh Thang: “Teinak ka Hmuh Cun Miphun ca, ka Sungh si cun Keimah Pumpak ca”

The Chin Journal | Hakha | Chin State
Dr Hmuh Thang

November 8, 2020 thimnak ah sunghnak nih a phakmi Dr. Hmuh Thang nih teinak ka hmuh ahcun kan miphun ca ah a si i, ka sungh a si cun keimah pumpak ca ah a si ko, tiah a chim.

“Kan mipi nih NLD vote pek an duh deuh ca ah a si ko lai cu. Kei cu mipi biachahnak hi kaa hrawm ko. Cucaah, kei cu ahlan zong ah ka rak chim bang in teinak ka hmuh ahcun kan miphun le kan ram ca ah a si i, ka sungh a si ahcun keimah pumpak ca ah a si ko,” tiah Dr. Hmuh Thang nih Chin World sin ah a chim.

Atutan Dr. Hmuh Thang aa zuamnak Thangtlang peng ramkulh hluttaw-2 hmunhma ah NLD in Sayama Ni Sui Lian, CNLD in Pu Hmun Ro Lian, Pumpak in John Lung Thli Tum le USDP in Dr. Hmuh Thang an i zuam hna i NLD in Sayama Ni Sui Lian nih a tei dih hna.

“Atutan vote a kan petu mipi an tlawm ko nain vote a petu an zapi cung ah kaa lawm tiah chim ka duh. Hi hnu thimnak zong ah teinak hmu kho ding tiang in vote tampi kan pe tthan te u tiin chim ka duh,” tiah Dr. Hmuh Thang nih a chim chap.

Dr. Hmuh Thang a teitu sayama Ni Sui Lian hi 2015-2020 ah Thantlang peng aiawh in Pyituh Hluttaw ah a tthumi a si i, atutan ah ramkulh hluttaw ah i tthial i Dr. Hmuh Thang a vun zuamcawh tik ah teinak a hun hmuh tthan hi a si.

Atutan thimnak ah Chin ramkulhpi huap in NLD nih tthudan 36, CNLD nih tthudan 1 le ZCD nih tthudan 2 ttin an co hna.

[Credit: Chin World]

© The Chin Journal thawngpang Website dang ah nan tleng hrimhrim lai lo.

HNUBIK THAWNGPANG


ELECTION


COVID-19