Dr. Aye Aye Ngun: Laitlang Fimcawnnak Cu Ka Remh Khawh Lai Ti Ka Zumh

| The Chin Journal | Hakha, Chin State

Teinak ka hmuh cun Laitlang fimcawnnak lei hi cu ka remh khawh lai ti ka zumh ko, tiah Dr. Aye Aye Ngun nih The Chin Journal he biaruahnak ah a chim.

Dr. Aye Aye Ngun cu Hakha peng Amyotha Hluttaw No. 1 ah NLD aiawh in aa zuam dingmi a si i, kan hnu thla ah kha pumpak biaruahnak kan ngeih i cu lio ah cun a cunglei bang in a chim hi a si.

“Fimcawnnak lei ah kum 40 hrawng rian ka rak ttuan i ka theihngalhnak le ka hmuhtonmi pawl hmang in fimcawnnak lei hi cu ka remh khawh lai ti ka zumh ko. Cucaah, atutan thimnak ah hin mipi nih an ka dawt ahcun teinak ka hmuh ko lai ti ka zumh,” tiah a langhter.

Dr. Aye Aye Ngun cu Mandalay University, Yangon (North) University, Dagon University, Meiktila University, Sittwe University, Minywa University, Hpa-An University, Panglong University tibantuk pawl ah Professor rian nganpi a rak ttuan balmi a si i, Hakha College zong ah Vice-Principal a ttuan balmi a si.

Dr. Aye Aye Ngun nih, “Laimi ca ah a herh bikmi cu fimcawnnak hi a si ko. Atu hmanh ah hin Taang-10 a phimi minung 100 lak ah minung 20 hrawng hi an awng hnga ma? An sung lengmang ko. Zei ruang ah dah timi hi ka vun zoh tik ah Laitlang fimcawnnak hi ahram bak in remh i tthanchoter a hau ti hi ka hmuh. Cucaah, hihi ka zuam lai ka timi a si,” tiah a chim chap.

NLD Party hi atutan 2020 zong ah biatak tein ttanh i dirpi a herh, tiah Dr. Aye Aye Ngun nih a chim chap.

“Atu kan ram Constitution hi zapi nih kan theih bang in 2008 ah ralkap nih anmah duh in an rak suaimi a si tik ah a chambaunak tampi a um. Tikah, NLD party i hruainak in remh lawng ah a ngah ding a si tiin ka zumh. Cu ruang ah cun NLD party hi 2008 Constitution remhnak ah abiapi tuk i, atutan zong ah biatak tein ttanh a herh tiin ka hmuh,” tiah a chim.

Latest News

News in Burmese