Donald Trump He 2020 ah President i Cuh Ding in Joe Walsh Nih Thawng a Thanh

| The Chin Journal | Hakha, Chin State

Republican Party chungtel thotho a simi Joe Walsh nih aralaimi US President thimnak ah President Donald Trump ka zuamcawh lai, tiah Zarhpi Ni ah thawng a thanh.

Joe Walsh nih, “White House ah President si awk hrimhrim aa tlak lomi pa a um kan theih dih. Bia a chim paoh ah lih lawng te a kaa in a chuak,” tiah President Trump cu a soisel.

Kum 57 a simi Joe Walsh hi aluancia 2011-2013 karlak ah khan Illinios aiawh in Republican palai a rak tuan balmi a si.

Mah hlan ah President Trump a dirkamh ngaitu zong a si nain nehhnu ah Republican Party chung in President Trump a riantuan ning a kherhvaih biktu a hung si than.

Naite Poll an lak ning ah Republican Party chung in Joe Walsh a dirkamhtu le a cohlangtu hi zatuak in 88% tluk bak an si i a sang ngaingai.

Joe Walsh lawng si loin Republican Party chung thotho in President Trump zuamcawh ding in min aa pemi minung a dang pakhat a um ve: cu pa cu Bill Weld tiah theihmi a si i, 2016 lio ah US Vice-President a rak i cuh vemi a si.

US President thimnak cu aralaimi November 3, 2020 ah an tuah telai tiah theih a si.

-The Guardian

Latest News