Donald Trump Dirhmun a Tha Ti Lo, Biden nih Tei Dawh

| The Chin Journal | Hakha, Chin State

US rampi a hruaitu ding President thimnak vote cu rel cuahmah a si i, US rammi lawng si loin vawleicung mipi nih thimdomh in cuanh cio a si.

Aluancia suimilam pahnih thum ah khan Donald Trump nih ka tei cang tiah a chim chung nain atu Electoral Vote an hmuh ningcang zoh tik ah Democrat candidate Joe Biden nih a hun thlau ngai.

US ramchung State tam u nih an thlakmi vote an rel dih cang i, Electoral Vote 538 chung ah Biden nih vote 248 a hmu i Trump nih 214 a hmu (Atu cattial lio tiang ah). Vote 270 a hmumi nih tei a si.

Atu ah cun Swing States (asiloah) Battleground States (Laiholh in: Aho nih dah a tei ngaingai lai timi chimchung a harnak/biapi in an i zuamnak) ramkulh panga ah vote an thlakmi rel ding a taang rih.

Cu ramkulh hna cu: Georgia , Michigan, Nevada, North Carolina le Pennsylvania hi an si.

Electoral Vote 16 a umnak Georgia, vote 15 a umnak North Carolina le vote 20 a umnak Pennsylvania ah Trump nih a tei deuh (A fiang thai rih lo).

Asinain, Electoral Vote 16 a umnak Nevada le vote 6 a umnak Michigan ah Biden nih a tei deuh ve (A fiang thlu rih lo). Hi Michigan le Nevada ah hin Biden nih a tei thai ah cun President tlin khawhnak ah a herhmi Electoral Vote 270 a co lai caah Trump cu a sung lai.

Trump nih a tei khawh nakhnga ca ah Georgia, North Carolina le Pennsylvania ah teinak a hmuh a herh pin ah Michigan asiloah Nevada pakhat chingchang ah teinak a hmuh a herh.

Michigan le Nevada ah hin Biden nih a tei deuh nain atu tiang ah cun tam in a thlau lo. Trump zong nih lonh khawh tthan a si.

Senate (Upper House) tthudan 100 an i cuhmi ah atu tiang ah cun Republican nih vote khat in an tei hna. (Republican – 48 vs 47 – Democrat). Vote 51 a hmuhmi tei a si.

House of Representative i tthudan 435 an i cuhmi ah cun Democrat hmaisuang in a kal. (Republican – 185 vs 200 – Democrat). Vote 218 a hmumi nih tei a si.

[Cherhchan: Fox News’ Election Live]

Latest News