Daw Suu nih AA Pawl Doh Ding in Kawl Ralkap Bia a Cah Hna Timi Kong Nizaan i Tuahmi Press Conference ah an Chim

| The Chin Journal | Hakha, Chin State

AA hriamtlai pawl doh ding in State Counsellor Daw Aung San Suu Kyi nih Kawl ralkap bia a cah hna nak kong March 25 ralkap press conference ah ralkap lei nih an chim.

Daw Suu biacah hi zapi theih awk tlak a si ruang ah atu bantuk in thawngthanhnak kan tuah hi a si tiah ralkap thawng dikhmaan thanhtu committee in chairman General Htun Htun Nye nih a chim.

Aluancia March 18 i tuahmi ralkap thawng dikhmaan thanhtu committee press conference ah Daw Aung San Suu Kyi biacah kong cu ralkap nih an telh chih. Hi kong he pehtlai in nizaan i tuahmi press conference ah reporter pakhat bia halmi chung in ralkap nih bialehnak an tuah than hi a si.

Ralkap bialehmi chung ah “Zapi theih awk a tlak ko kan ti caah, kan langhtermi a si” tiah an chim.

“Daw Aung San Suu Kyi biacah kong he pehtlai in press conference ah an langhtermi hi cu Privileged Information a si caah keimah lei in cun zeihmanh chim ka duh lo” taih President Office in chimnak nawlngeitu U Zaw Htey nih a chim.

“Privileged Information timi cu theih awk a tlakmi minung lawng nih theih ding a si i mizapi theih ding thawngpang a si lo” tiah Myanmar Institute for Peace and Security in Director Min Zaw Oo nih a chim.

-7Day

Latest News