David Lai nih Tangka Fang in Ting 50 Bawmhnak Ralzam a Pek Hna

| The Chin Journal | Hakha, Chin State

Hlasa David Lai nih Sami ralzam Camp ah a ummi Peletwa ralzam pawl cu thilri in si loin a tangka fang in ting 50 bawmhnak a pek hna, tiah theih a si.

David Lai te cu April 11 ah Sami ralzam Camp ah an phan i, ralzam bawmchantu bu sin ah tangka ting 50 bawmhnak a ap hna hi a si.

David Lai nih Paletwa ralzam ca ah tiin Yangon lamkam hlasaknak in tlawm halnak a tuah i ting 100 hrawng a hmuhpiak hna.

Cu a hmuhmi zapi chung ah cun ting 45 man hrawng hi ralzam ca ah sii-ai a cawkpiak hna. Cun, Mindat sizung ah hliamhma a pumi ralzam pawl tangka bawmhna a vung pek chap hna.

David Lai he a kalmi Rev. Uk Ling Thang nih, “Ralzam bawmchantu sin ah ting 50 a pek hna. Atu zaan hi ralzam Camp pahnih hrawng fonh in pumhnak kan tuah lai i, hlasaknak zong a ngeihpiak hna lai,” tiah a chim.

David Lai lawng si loin Hakha, Falam le Taungyi lei in Chinmi hna zong nih Sami ralzam camp ah a ummi pawl cu bawmhnak an vung pek ve hna.

Sami ah ralzam bawmhnak a phan ngai cang ko nain Paletwa ah a ummi ralzam 3,000 leng bel sin ah hin bawmhnak pakhat hmanh a phan kho rih lo.

Sami le Paletwa karlak ah AA hriamtlai pawl an cawlcangh ca ah atu tiang Paletwa lei ah bawmhnak kalpi khawh loin an i hren hi a si.

Latest News

News in Burmese