, /

David Lah nih VP Henry Van Thio a Ton Hnu Ni 40 ah Case 34 Hi Sizung ah an Chiah

The Chin Journal | Hakha | Chin State

David Lah le Myo Gyi te Pathiant thangthatnak bu ah aa telmi mi tam u COVID-19 zawtnak an ngeih hnu in ruah lo piin kan Vice President Henry Van Thio cung ah mipi nih an mit an thlak colh.

Aruang cu February 9 lio i pumhkhawmhnak pakhat ah David Lah le Henry Van thio naihniam in an tthut tti lio le an kal tti lio hmanthlak online ah a hun langh caah a si.

Myanmar President Zung chimnak nawlngei U Zaw Htay nih, “Vice President telh in minung 30 ngandamnak checknak kan tuah hna lai,” tiah nihin zing ah thawng a thanh.

David Lah te tuanbia aa thawk ning cu hitihin a si: COVID-19 tlerhkhawnnak a um hnu in Kawlram zong ah mibu tonpumhnak acozah nih a khenkham. Khrihfabu pawl ah pumh a ngah ti lo.

Cucaah, David Lah le Myo Gyi te bu cu Yangone ramtthen, Mayangone peng chung i, 8 Mile ah a ummi biakinn pakhat ah pumhnak an tuah i, cu pumhnak an tuah lio cu Dream Ministry International timi Facebook Page hmang in Live an thlah tawn. (An Facebook Page an thah cang).

Hi David Lah te pumhnak hmun ah hin Singapore in March 18 ah a rak phanmi kum 20 tlangval aa tel ve i, Keyboard zong a tumpiak tawn hna.

Hi pate hi damlo in a um i, March 20 hrawng ah Quarantine in an chiah hnu ah March 12 ah COVID-19 zawtnak a ngei (Case 34), taih Myanmar ram ngandamnak zung nih thawng a thanh.

Case 34 tlangval pa Myanmar ram a rak phak caan le Vice President Henry Van Thio le David Lah an i ton caan hi ni 40 hrawng aa hlat. Mah hlan ni 40 hrawng ah khan David Lah le Henry Van Thio an rak i tong tinak a si.

Cun, Case 34 zawtnak a ngei tiah an fehter caan le David Lah le Henry Van Thio an i ton caan hi ni 60 hrawng aa hlat.

Hi Case 34 nih hin David Lah te Group ah zawtnak a ratpimi a si ko ahcun Vice President Henry Van Thio te sin ah zawtnak chonh khawh nakding lam a tlawm tuk. A um hrim lo ti khawh zong a si.

Asinain, COVID-19 zawtnak hi ni 32 hrawng tiang langh loin a um kho ti a si ve.

Chim duhmi cu David Lah te Group ah Case 34 nih COVID-19 zawtnak hi a ratpimi si loin mah hlan David Lah te Group ah COVID-19 zawtnak a rak um cang a si ahcun Henry Van Thio le a chungkhar ca ah zeimawzat thinphannak um khawh a si ve.

THAWNG THAR

The Chin Journal Internship Program ah Thantlang, Hakha le Falam ah a ummi paoh i tel khawh a si. Hi Internship Program ah i tel na duh ahcun APPLICATION FORM hi phi ve.