‘Hope Blood Donor Organization’ nih Kum Khat Chung ah Thisen Thawl 500 Hrawng an Hlut

| The Chin Journal | Hakha, Chin State

Hakha hrambunh ‘Hope Blood Donor Organization’ nih kum khat chung ah, mizaw caah thisen thawl 500 hrawng an hlut tiah thawng kan theih.

Hi kong he pehtlai in HBDO hruaitu Pu Cung Hu nih “2018 ah hin lang 500 hrawng a si, kum 1 chung ah. Tu kum hi thla 3 si cang, January, Febraury, March a si i mah chung ah hin lang 150 hrawng paoh cu a si cang lai” tiah The Chin Journal ah a chim.

Thla 1 chung ah hin operation siseh, thi a reumi si hna seh, nau a chuakmi siseh, thi aa luakmi si hna seh thi hlut a haumi minung 20 in 30 kar an um tawn i thisen lang 40 in 60 kar lengmang thla 1 chung ah an hlutnak kong zong a chim chap.

“Thi hi a har taktak, a baat zong kan baa ngaingai. Thla rak kan campiak ve hna seh, thazaang zong rak kan pe cio hna seh. Mino ngaknu/tlangval zong, patung nutung zong thi a hlu khomi poahpoah cu thi hi rak hlu cio hna sehlaw anmah ca zong ah tha, mi ca zong ah a tha, kan dihlak caah a si, kan sawm hna. Cun kan riantuannak phaisa a kan hlutu ramchung/ramleng cung ah kan i lawm tuk hringhran” tiah a chim.

Latest News