COVID-19 Zawtnak Khamnak ah Zu Thalo an Din Caah Minung 27 an Thi

| The Chin Journal | Hakha, Chin State

Iran ram, Khuzestan ramkulh le Alborz ramkulh chung ah COVID-19 zawtnak khamnak ca ah tiin zu tthalo an din caah minung 27 an nunnak a liam, tiah March 9 ah Iranian thawngzamhnak pawl nih an ttial.

“Micheu nih zu nih COVID-19 zawtnak a kham khawh timi biavakvai an theih caah zawtnak khamnak ca ah an ding” tiah Iran ram i, sii lei fimcawnnak Ahwaz University chimnak nawlngei Ali Ehsanpour nih a chim.

Iran ram ah COVID-19 zawtnak fak tuk in a tlun tik ah zeitindah COVID-19 zawtnak in kan i kham lai timi ahmaanlomi thlopbulnak ningcang pawl online ah a kai len.

Iran ram cu zu zuar an khapnak ram a si tik ah an ram ah a um chunhmi zu hi zu tthalo a tam tuk i, atu ah minung 27 tiangtiang in an hun thih phahnak hi a si.

A nunnak a liammi pawl nih an dinmi zu hi mah tein chuanmi zu a si i, zu a chuangtu minung 7 zong tlaih an si cang.

Iran ram cu atulio ah vawleicung COVID-19 zawtnak a zualnak bik ram 3 nak a si i, atu tiang ah minung 291 an nunnak a liam i, minung 8,000 leng zawtnak an i chawn.

Ref: ABC News

Advertisement

Thawngpang Thar