/

COVID-19 Thlopnak ah 90% Hmual a Ngeimi Sii an Ser Khawh

The Chin Journal | Hakha | Chin State
COVID-19 thlopnak ca ah a ttha bikmi Pfizer's Coronavirus Vaccine timi an serchuah khawh

COVID-19 zawtnak thlopnak ah 90% tluk in hmual a ngeimi sii phun khat cu Germany ram ah a ummi sii lei scientist nuva nih tlamtling in an ser khawh, tiah CNN nih a langhter.

Hi sii a sertu nuva hna i Germany ram Mainz khua ah a ummi BioNTech timi sii lei hlathlai le serchuahnak company a ngeitu Ugur Sahin le a nupi Ozlem Tureci an si.

Pfizer’s Coronavirus Vaccine a serchuahtu nuva hna-Ugur Sahin le a nupi Ozlem Tureci

An sermi COVID-19 sii hi Pfizer’s Coronavirus Vaccine tiah min an pek i sii a hneksaktu sceintist pawl nih, “Atu tiang a chuakmi COVID-19 thlopnak lak ah hmual a ngei bikmi a si,” tiah an langhter.

Pfizer’s Coronavirus Vaccine sii a serchuahtu Ugur Sahin nih, “Vawleicung mipi ca ah thawngttha ngaingai a si. Atu ah cun COVID-19 zawtnak hi mah sii (Pfizer’s Coronavirus Vaccine) hmang in tlau lak in thlop khawh a si timi kan hmuh cang,” tiah a chim.

Pfizer’s Coronavirus Vaccine serchuahnak ah Ugur Sahin te nuva le US ram i sii serchauhtu Pfizer timi company hi pehtlai in rian a ttuanmi an si i, cu sii zong cu Pfizer’s Coronavirus Vaccine tiah an auh.

Pfizer’s Coronavirus Vaccine tlamtling in an serchuahmi kong he pehtlai in Pfizer CEO Albert Bourla nih, “Kum 100 chung ah a lianngan bikmi sii lei tthanchonak pakhat kan tlamtlinh a si ko,” tiah a chim.

Hmai kum 2021 chung ah Pfizer’s Coronavirus Vaccine siitlang 1.3 billion tiang in serchuah ding in timhtuah a si i, COVID-19 mizaw zualhma pawl lakhruak thlopnak ca ah hman colh ding in US Food and Drug Administration sin ah nawl halnak tuah an timh cang, tiah theih a si.

[Cherhchan: CNN – The scientists who developed the Pfizer/BioNTech Covid-19 vaccine are a Turkish-German power couple]

© The Chin Journal thawngpang Website dang ah nan tleng hrimhrim lai lo.

HNUBIK THAWNGPANG


ELECTION


COVID-19