COVID-19 Runvenak Thilri Chambaunak Kong a Chimtu Sibawi Mihrut Sizung ah an Kuat

| The Chin Journal | Hakha, Chin State

India ah COVID-19 zawtnak in i runvennak ca ah thilri lei in chambaunak a um tiah mizapi theih in a chimphuangtu sibawi cu Mihrut Sizung ah an kuat, tiah theih a si.

Hi sibawi hi Dr Sudhakar Rao tiah theihmi a si i, sibawi rian kum 20 chung a ttuan cangmi a si.

Dr Rao hi acozah sizung ah rian a ttuanmi a si i, April 3 ah khan COVID-19 kong ah acozah lei ttuanvo ngeitu hna he meeting an tuah i, cu lio ah cun “COVID-19 runvennak thilri sibawite kan i tingzo lo,” tiah lungrethei in a chim.

Sizung ah COVID-19 runvennak thilri kan i tingzo lo tiah a chim ruang ah meeting khaan chung in chuah a tong.

Reporters pawl nih bia an hal lio ah, “Mask pakhat hi ni 15 chung a kan hmanter. Hitihin cun zeitindah mizaw cu kan thlop khawh hna lai,” tiah a chim.

Cuti a chim hnu cun Dr. Rao cu a rain in an dinhter i, May 16 ah khan palik nih lampi ah an tlaih.

Palaik nih Dr. Rao lampi ah an tlaih lio

An tlaih lio video zong India online ah a hun kai i, palik pa nih Dr. Rao a tuk lio zong a lang. Dr. Rao a tutu palik pa zong a rian in an dinhter chung ve.

Atu bantuk in Dr. Rao an tlaihmi kong ah India ramchung Social Media ah duhlonak tam ngai a um i, Facebook le Whatsapp ah acozah thilti ning cung ah duhlonak an langhter len hna.

Lampi ah palik nih an tlaih i, motor chung an luhpi hlan ah Dr. Rao nih, “Ka phone an ka chuh i an ka tukvelh fawn” tiah reporter pawl sin ah a chim.

Sihmanhsehlaw, palik nih cun “Kan tlaih lio ah Dr. Rao hi puarhrang tuk in a um. Palik phone a chuh i a hlohpiak. A umtu ning zoh ah thluak lei tlamtling loin um sehlaw a dawh,” tiah an ti.

Palik nih an tlaih hnu ah sizung ah an kalpi i cu hnu cun Dr. Rao cu thluak tlamtling lo hna an chiahnak sizung ah an ap, tiah theih a si.

Cherhchan: BBC, Time of India

Latest News

News in Burmese