COVID-19 Ruang ah Kawlram Misifak Hna Fak Khun in Har an Tong Lai: World Bank

| The Chin Journal | Hakha, Chin State

COVID-19 zawtnak nih Kawlram sipuazi a fumter lai i misifak hna ko nih fak khun in an tuar lai, tiah World Bank nih ralrin a pek.

Tutan zarh cacawn nithum ni ah COVID-19 zawtnak kong he pehtlai in World Bank nih cathluan a chuah i Myanmar ram cu sipuazi tthanchonak lei ah har tuk in kar a hlang liomi zong a si i, atu COVID-19 zawtnak ruang ah hin sipuazi ttumchuknak a tong lai, tiah a langhter.

Myanmar ramchungchuak thilri 2% in 3% tiang a ttumchuk lai i, cu ruang ah cun abikin sifakmi hna nih harnak an tong khun lai, tiah a ti.

Myanmar ram nih ramleng ah abikin a kuatmi cinthlak chuak tirawl le thilthaan pawl cu ramdang ah ahlan bang in kuat khawh a si ti lai lo tik ah ramleng tangka lut zong a zor lai.

Myanmar ram nih ramleng ah a kuatmi thilri pawl in a hmuhmi zapi i, 13% cu cinthlak lei le thlithaan in hmuhmi an si.

Cun, 16% hi ramleng lei khualtlawng a rung lutmi sin in hmuhmi a si i, COVID-19 ruang ah a cunglei sipuazi lam an hun pih tik ah Myanmar ram sipuazi a vun hnorsuan ngai lai.

COVID-19 zawtnak hi zeitik tiang a caam lai timi theih a si lo nain atu bantuk in caantawi sipuazi harnak a can tik ah abikin sifak hna nih harnak an tong khun, tiah World Bank nih a langhter.

Myanmar ramchung milu zapi i, 68% cu khuate lei khuasa sifak deuhmi kan si caah COVID-19 ruang ah a chuak dingmi harnak hi zeitindah chimphoih khawh a si lai timi ralrinnak tuah cia ding in World Bank in ruahnak peknak zong a langhter.

Latest News

News in Burmese