COVID-19 Ruang ah Kawlram ah Thahnawnnak a Chuak

| The Chin Journal | Hakha, Chin State

COVID-19 zawtnak kong he pehtlai in April 4 ah khan Pegu ramtthen ah thahnawnnak a chuak, tiah theih a si.

Pegu ramtthen, Kyupyinkoh khua i khual riahbuk (Guest House) pakhat ah aa thummi pa damlo in a um ruang ah sang uktu le sang upa pawl nih COVID-19 mizaw hna a si sual ah tiin check ding in an vung kal.

Sihmanhsehlaw, Guest House ngeitu U Maung Aye nih a rak donh hna i kan khualbuk ah COVID-19 mizaw a um ti phun in sang chungmi he ral na kan ser hramhram tiah a rak ti hna.

A thaizing ah U Maung Aye nih minung 20 hrawng aa sawm hna i sang uktu cu innlam an vung fenh.

Sang uktu chungkhar cu U Maung Aye te nih vainam in an sam hna caah innchung ah a ummi kum 26 pa Aung Zaw Zaw a nunnak a liam.

Cun, U Aung Ko timi pa zong a lu le a hngawng ah vainam hma fak ngaiin a tuar i Yangon sizung ah an ratpi. Hi pa hi sizung ah zualhma ngaiin a um.

Cun, innchung ah a um vemi Daw San San Maw zong a lu ah hliamhma a tuar ve pin ah a fale pahnih zong hliamhma an pu ve.

Vainam in innlam a rak fenhtu Guest House ngeitu U Maung Aye le a hawile pawl cu an zaam i palik nih an kawl hna lio a si.

U Maung Aye le a hawile pawl cu mithah lainawnnak pohma 302, mi cung fahnak peknak pohma 326 le mi innhmun ah nawl onh loin vung luhnak pohma 114 in taza an cuai hna, tiah theih a si.

Ref: Irrawaddy

Latest News

News in Burmese