COVID-19 Ruang ah Kawlram ah Facang Kan Har Nakhngalo Cozah nih Facang Ton 100,000 a Chiah Lai

| The Chin Journal | Hakha, Chin State

Vawleicung sipuazi a hun hnorsuang thluahmahtu COVID-19 zawtnak ruang ah Kawlram ah facang harnak a tlun sual nakhngalo Myanmar cozah nih facang Ton-100,000 a chiah lai, tiah theih a si.

Atulio vawleicung a cultu COVID-19 thlihran zoh in atu bantuk in facang Ton-100,000 i chiah cia ding in Myanmar cozah nih khua a khaan hi a si.

“Atulio COVID-19 zawtnak hi zei caan tiang dah a rauh rih lai ti kan thei lo. Cucaah, i ralrinnak ah facang hi kan i chiah cia lai kan ti,” tiah Myanmar ramchung tirawl lei a tawlreltu bu i Chairman U Ye Min Aung nih a chim.

Ramchung ah facang kan i zat nakhnga bu pathum rian an ttuan tti lai. Cu bu hna cu “Union of Myanmar Federation of Chambers of Commerce and Industry” timi, “Myanmar Rice Federation” timi le atulio cozah bu hi an si.

Atu laklawh ah cun Myanmar ah COVID-19 zawtnak a phan rih lo nain innpa ram a cul dih cang ti awk tluk in a um i, kan i ralrin a herh ngaingai, tiah U Ye Min Aung nih a chim chap.

COVID-19 zawtnak in i runvennak ca ah vawleicung ram tampi nih an ramri khar cio a si i, chawlehthalnak lam a pihter tik ah Myanmar ram zong ah zawtnak a tlun sual a si ahcun facang kan har lo nakhnga atu bantukin an timhtuah hi a si.

Latest News

News in Burmese