COVID-19 Ruang ah Kalay University Caminpuai Dih Manh Loin an Khar

| The Chin Journal | Hakha, Chin State

March 23 zan ah Myanmar ram ngandamnak zung nih COVID-19 zawtnak an hmuhnak kong thawng an thanh hnu in Kalay University zong nihin zinglei thawk in an khar, tiah theih a si.

Kalay University caminpuai an tuah lio a si i, Subject pahnih phit ding a taang rih nain caminpuai dih manh loin an hun khar colh hi a si.

COVID-19 zawtnak a ngei tiah Tedim sizung ah an zohkhenhmi kum 37 Chin pa hi Kalay hrawng ah kha hlan ah khan a phan balmi zong a si caah an hun i ralrin khunnak a si.

Kalay University ah caminpuai a phimi Laimi siangngakchia pakhat nih, “COVID-19 ruang ah nihin zing in an khar cang. Caminpuai kan dih rih lo, subject pahnih aa duh rih. Kai tthannak nicaan thawng kan in thanh te hna lai a kan ti,” tiah a chim.

Atulio vawleicung ram 180 hrawng ah COVID-19 zawtnak a ngeimi minung 370,000 leng an hmuh cang hna.

Cu chung ah cun minung 100,000 hrawng nih damnak an hmu tthan i a dang minung 16,000 leng an nunnak a liam cang.

Tuan deuh ah cun zawtnak aa thawknak Tuluk ram hi a thimi an rak tam bik nain atu ah cun Italy ram hi COVID-19 zawtnak in a thimi a tam bik an hun si cang.

Tuluk ram ah minung 3,270 an nunnak a liam i, Italy ram ah atu tiang ah minung 6,077 an nunnak a liam cang.

Latest News

News in Burmese