COVID-19 Phungbuar in Pumhnak a Tuahtu American Pastor COVID-19 Zawtnak in Nunnak Liam

| The Chin Journal | Hakha, Chin State

US ram, Virginia ah COVID-19 zulhphung buar in pumhnak a tuahtu Bishop Gerald Glenn (kum 66) cu COVID-19 zawtnak in a nunnak a liam, tiah ABC News nih April 13 ah a langhter.

Virginia State, Chesterfield khua ah a ummi New Deliverance Evangelistic Church ah March 22 ah khan COVID-19 phung buar in Bishop Gerald Glenn nih pumhnak a tuahpi hna.

Virginia ramkulh cozah nih cun March 17 ah khan mibu pumhkhawmhnak tuah lo ding in nawl a rak chuah cang.

March 22 pumhnak ah cun Bishop Glenn nih, “Hi zawtnak rungrul nakhin Pathian hi a lianngan deuh i a tthawng deuh tuk tiah fek tein ka zumh. Sizung le Thonginn ah ka phak lo chung paoh cu pumhnak ka tuah peng lai,” tiah a chim.

Bishop Glenn cu March 25 thawk in damlo hram a thawk i sibawi sin ah aa zohfelter ko nain a zawtnak zual lei a panh.

April 3 ah an COVID-19 zawtnak a ngei tiah an fehter i, zarh khat hrawng a rauh hnu April 11 ah a nunnak a liam.

A nupi le a fale pawl zong COVID-19 zawtnak a chonh ve hna ca ah thlopbulnak an tuah cuahmah hna lio a si.

Ref: ABC 8 News, The Christian Post

Latest News

News in Burmese