Covid-19 nih Vawleicung Sipuazi a Hnorsuan Thluahmah Cang

| The Chin Journal | Hakha, Chin State

December 2019 in Tuluk ram, Wuhan khua in aa thawkmi Coronavirus (Covid-19) nih vawleicung ram 180 leng a hun cul cang i, mi thi zong 9,000 an phan cang (March 19).

Vawleicung sipuazipi zong a hnorsuan ningcang a fak chin thluahmah  i, Euro (Europe ah hmanmi tangka) le Yen (Japan tangka) dahtilo a dang ram pawl i tangka man an ttum dih hna.

Covid-19 nih abikin vawleicung tangka tiluan a hun hnorsuan tik ah vawleicung ramkip ramhruaitu hna nih rampi sipuazi control khawh ding in an i zuam cuahmah hna.

European Central Bank nih cun tangka ttumnak (Recession) fak tuk in kan tong lai tiah an phan ruang ah March 18 ah khan sipuazi rianttuantu hna nih cawi khawh ding in $817 billion khulrang in a chiahpiak hna.

US cozah zong nih 2000 lio bang in tangka ttumnak fak tuk in kan tong sual lai tiah an phan cang caah Federal Reserve $3.8 trillion hi ralrin ah chiah ding in an timhtuah ve cang.

Vawleicung motor sertu company ngan bikbik a simi Ford, NV  le General Motors tibantuk pawl nih US le Canada ah a ummi an sehzung pawl khar ding in timhtuahnak an ngei ve cang.

Vawleicung tangka man sang bik pakhat a si tawnmi British tangka Starling Pound zong 1985 hnu in atu hi a niam bik caan ah a phan.

Australia ram zong an Financial System a hrawh lai ti phan ruang ah timhtuahnak an ngei cuahmah i, Central Bank Governor Philip Lowe nih, “Atu bantuk in abiapimi caan ah cun a herh ning paoh in cawlcangh ding in timhcia in kan um cang,” tiah a chim.

India le Brazil ram i bank pawl zong nih an tangka rianttuan ningcang a rawh nakhnga lo acozah sin ah tangka an hun cawi chung thluahmah ve cang.

Abikin, Asia vawleitthen chung ah a ummi South Korea, Indonesia le Philippines ah cun Stock Market man fak tuk in an ttum i, an sining Red Level ah an phan cang.

American sipuazi lei thiamsang JP Morgan nih, “Atulio a cangmi vawleicung huap Coronavirus ruang ah US sipuazi hi 14% in a ttum lai i Tuluk sipuazi zong 40% tluk in a ttum lai,” tiah a ruahdamh.

Atu tiang ah Vawleicung ram 134 ah Coronavirus a phan cang i, minung 220,000 leng nih zawtnak an i chawn.

Zawtnak aa chawnmi chung ah minung 80,000 leng nih damnak an hmu tthan i a dang 9,000 hi an nunnak a liam.

Ref: Reuters

Latest News

News in Burmese