Covid-19 Mizaw a Umnak Kaptel Khua an Daithlah Deuh

| The Chin Journal | Hakha, Chin State

US in a rak tlungmi COVID-19 mizaw Chin pa a rak umnak Tedim peng, Kaptel khua cu ngandamnak lei kong he pehtlai in daithlah deuh dirhmun in a um, tiah khuabawi nih a chim.

Khuabawi Do Za Thawng nih, “Khuachung in luh le chuah an kharnak hi atu in cun ni 4 chung a si cang. Asinain, kan khua ah ngandamnak lei a zohfeltu minung 2 lawng an um. Kaahuh zong kan ngei hna lo. Ngandamnak lei riantuantu pawl an rat zong ah ttihphang tuk in an um hna. Anmah pumpak zong i runvennak kaahuh le angki tibantuk an ngei lo i, ttihphang buin khua kan sa hna,” tiah a chim.

Minung 3,600 leng an umnak Kaptel khua cu US in a rak tlungmi pa COVID-19 zawtnak a ngei an ti hnu ah Lockdown an tuah i khualeng ah ahohmanh an chuahter hna lo.

Ni 4 chung lenglei he pehtlaihnak an phih cang ca ah Kaptel khua ah eidin tirawl lei zong in harsatnak a hun um thluahmah ve.

Asinain, Chin ramkulh cozah lei nih eidin tirawl pawl Kaptel khua ah pek ding in timhtuahnak a ngei i, a ruah hlan ah a phan lai.

COVID-19 zawtnak khenkhamnak ca ah thilri dangdang an ngei lo nain khua ah a ummi sibawite nih innkip ah lutchuak in an ngandamnak an check tawn ko hna.

COVID-19 zawtnak a ngeimi pa he naihniam in a ummi Kaptel khuami 36 cu ngandamnak riantuantu hna le uknak lei nih felfai khun in naihniam in an zohkhenh cuahmah hna, tiah theih a si.

Ref: Chin World

Latest News

News in Burmese