COVID-19 Miharsa Bawmhnak Kong ah Buainak a Chuak i Minung (6) Thah an Tong

| The Chin Journal | Hakha, Chin State

Afghanistan ram, Ghor ramkulh chung ah COVID-19 caan chung acozah bawmhnak kong he pehtlai in buaibainak a chuak i, minung (6) thah an tong, tiah BBC nih May 9 ah a ttial.

Buaibainak a chuahnak hmun hi Ghor ramkulh Firozkoh khua ah a si i, acozah nih miharsa pawl tirawl bawmhnak a pek ning hna kong ah mizapi lei in lungtlin lonak a um caah acozah zung hmai ah duhlonak an langhter.

Duhlonak langhter lio ah cun mibu chung in bu pakhat nih palik pawl meithal in an kah hna caah mizapi lak ah meithal in i kahnak a chuak.

Meithal kahnak ruang ah palik pahnih le rammi minung pali an nunnak a liam. A nunnak a liammi chung ah Radio thawngpang chimtu pa pakhat zong aa tel.

Minung paruk an nunnak a liam leng ah palik (10) le rammi (9) hliamhma an pu hna.

Hi kong he pehtlai hin Afghanistan rampi Vice President Amrullah Saleh nih, “Hi thil a canmi thawngpang kan theih cu a poi tuk hringhran. Acozah nih hlathlainak kan tuah cuahmah ko,” tiah a Facebook cahmai ah a ttial.

“COVID-19 caan chung ah acozah bawmhnak hi Afghan rammi zapi nih nan hmuh hrimhrim lai. Ahohmanh kan in hrelh hna lai lo,” tiah Vice President nih a langhter chap.

Afghan cozah nih bawmhnak a pekmi tirawl pawl miharsa hna sin ah tlamtlingte le felfai tein an phan lo ti ruang ah atu bantuk in mizapi lei in duhlonak langhter a chuah hi a si.

Latest News

News in Burmese