COVID-19 Kong ah WHO Director Rian Chuah Ding in an Hal

| The Chin Journal | Hakha, Chin State

Vawleicung ah COVID-19 zawtnak a karhmi kong he pehtlai in World Health Organization (WHO) i Director-General Tedros Adhanon Ghebreyesus cu a rian in chuah ding in minung tampi nih halnak an tuah, tiah theih a si.

Online in atu bantuk in halnak tuah tawnnak Change.org ah WHO Director kan chuahpiak u, tiah minung 718,000 leng nih min an pek cang.

Cu halnak an tuahmi cu Mirang ca, French ca, Spanish ca, German ca le Arabic ca pawl zong nih an leh i an zamh chin thluahmah.

“Tuluk ram ah COVID-19 zawtnak a rak i thawk ka ah khan WHO director nih tuante in vawleicungpi ca ah ttih a nung tiah thawng a rak thanh lo. Global Outbreak a si kho tiah tuante khan rak ti sehlaw hi COVID-19 zawtnak hi an rak control khawh ding a si,” tiah an ti i, a rian in phuah awk ah halnak an tuah hi a si.

WHO director nih hin COVID-19 zawtnak a rak can ka ah khan zawtnak kong ah Tuluk ram ah hlathlainak thukpi in tuah loin Tuluk cozah chimmi lawng a ngaih i, Tuluk cozah nih zawtnak a control ning cung ah thangtthatnak tu a rak chim.

Cucaah, atulio vawleicung minung 1 million leng nih COVID-19 zawtnak an i chawn cang i, minung 65,000 leng zong an nunnak laim cang.

Hi kong ah ttuanvo ngeitu bik pakhat cu WHO director hi a si ve tiah an ti caah WHO director rian he aa tlak lo tiin rian chuahter ding in halnak an tuah hi a si.

Ref: The Jerusalem Post

Latest News

News in Burmese