Covid-19 zawtnak kong ah lungrethei tuk in a ummi German vuanci pakhat cu March 28 ah tlanglawng lam pawng ah a ruak in an hmuh, tiah theih a si.
A nunnak a liammi vuanci hi Thomas Schafer (kum 54) a si i, German ram, Hesse ramkulh i Finance Minister a si.
Hesse ramkulh cozah President Volker Bouffeir nih, “Hi thawngpang kan theih cu kan khuaruah a har i kan ngaih zong a chia tuk. A zumh hmanh kan i zumh lo,” tiah a chim.
A nunnak a liammi Schafer hi Hesse ramkulh i Finance Minister rian kum 10 chung a ttuan a cangmi a si i, atulio COVID-19 zawtnak ruang ah sipuazi rawhralnak kan ton nakhngalo company pawl le sipuazi rianttuan pawl he chunzaan in rian a ttuanmi a si, tiah Bouffeir nih a chim chap.
“Atulio harton caan i thilti kho minung kan herh tuk lio ah a kan kaltakmi cu a poi hringhran,” tiah Bouffeir nih a langhter chap.
Schafer a thihnak kong a hlattu palik le sihnih pawl nih COVID-19 ruang ah sipuazi a rawh nakhnga lo lungretheih tuk in a um ruang ah amah tein aa thatmi a si lai, tiah an zumh.
Ref: Eurativ, DW, Business Today
