Coronavirus Mizaw Thlopnak ah Tuluk nih Ni 10 Chung ah Sizungpi Sak a Timh

| The Chin Journal | Hakha, Chin State

Tuluk ram ah a cangmi Coronavirus mizaw pawl thlopbulnak ca ah Tuluk nih ni 10 chung ah sizungpi sak lim ding in a timhtuah, tiah theih a si.

Ni 10 chung ah lim ding in an timhtuahmi sizung hi ihkhun 1,000 tlum sizungpi a si i, Coronavirus aa thawknak Wuhan khua ah an sak nihin in an sak cuahmah cang. February 3 ah on khawh ding in timhtuahnak an ngei.

Rul in a chuakmi zawtnak tiah an zumhmi Coronavirus aa thawknak Wuhan khua ah hin minung ting 100 leng an um i atu ah cun Airport, Bus Station, Train Station le khuachung Bus le Tlanglawng pawl zong rian an khar dih cang.

Wuhan khua lawng si loin a pawng ah a ummi Huanggang khua zong lenglei he pehtlaihnak ngaih lo ding in kutka khar a si ve. Coronavirus a karh lo nakhnga cozah nih atu bantuk in a tuah hi a si.

Atu tiang ah Coronavirus ruang ah Tuluk ram ah minung 26 an nunnak a liam cang i, minung 1000 hrawng zawtnak an i chawn.

Vanderbilt University ah Professor a simi Dr. Bill Schaffner, “Atulio Tuluk ram ah a cangmi Noval Coronavirus zawtnak a damh khotu sii ngaingai a um rih lo. Asinain, ningcang tein conghramhmi mizaw chung in a dam thaimi an um len ve ko,” tiah a chim.

Coronavirus hi phun 7 in a um–Tuluk ram ah a cangmi hi “Noval Coronavirus” (CoV) tiah an auhmi a si. Abikin Rul in aa thawkmi zawtnak a si kho, tiah an zumh.

Minung le minung i chawnh khawhmi zawtnak a si i, aklinh, thawchuah har, Kal le Thin a rawhter i, fak piin khuhkhuh le kiktlaih tibantuk in zawtnak a lang tawn.

Wuhan khua i rili tizu-ngacel pawl phohte in an zuarnak Market (Seafood Wholesale Market) in hi “Noval Coronavirus” hi December 2019 khan aa thawk tiah an zumh.

Cherhchan: Reuters/Xinhua/Asian News Network

Latest News

News in Burmese