CNF/A Secretary Hlun Paul C. Tha nih Dr. Sasa a Dirkamh

| The Chin Journal | Hakha, Chin State

CNF/A hriamtlai bu a dirhtu ah a rak i tel i CNF/A Secretary zong a rak ttuan balmi Pu Paul C. Tha nih Dr. Sasa dirkamhnak ca nizan ah a ttial.

Pau C. Tha nih a ttialmi cu a tanglei bantuk hin a si:


Dr. Sasa hi a pa (Pupah A.B) raithawinak, an chungkhar thlacamnak, (amah pumpak hrimhrim,  thla a cam tukmi a si) pekchanhnak le zumhnak in atu dirhmun a phan khomi a si caah amah mual a phohmi le zoh a langhmi hna ca ah thla a campiak an timi hi a campiak hrim lai, tiah ka zumh.

Doctor aa limka ah Kawlram chung luh a ngah rih lo. Health and Hope Clinic (Sii-inn), Indo-Burma Border ah a dirh. Harsatnak tampi a rak tong. Sii-inn dirh khawh lo ding tiang in a dohtu an rak um. A dohtu vialte hna kha thlacam lungsaunak in pakhat hnu pakhat a va panh hna, a va nawl hna, an tang ah a va dor hna.

Cu lio ah cun atu i thangchiat, mualphohnak ca bantuk hi an rak chuah i, Mizoram cozah sin tiang an rak kuat. An Report. Cu reportnak ca pawl cu keimah zong a rak ka zoh ter i ka rak hmuh, karak rel ve bal.

Ih, atu i khua a ka ruahter ngaimi pakhat cu:

Politics kan celh tive ko ttung i mi thangchiat chim (pumpak zoh va langh) le mi mualphoh a hmangmi hna hi miphun le ram a dawtu an si kan ti kho hna hnga maw? Ti hi a si.

Micheukhat nihle “Heh” tiah mi thangchiat buin Me pung an i dawnh ve hui. Mi congoih chim in Me kawl a hmangmi kan um.

Hi MP aa cuhmi pa hi cu Dr. Sasa a huat tuk ruang ah Me ka pek lai (asiloah) Pu No Than Kap a huat tuk caah hi pa/nu hi ram a dawt bak a si, tiah a timi kan mipi chung ah an um ka zum lo.

Mi pumpak soi si loin adiklo ning piin mipi an hlen i lih hna an chim a si ahcun an bia lila in den ve tthan ding an si ko.

Dr. Sasa hi MP thimnak ah aa pemi/aa cuhmi zong a si lo. NLD Me hmuh khawhnak ca ah bawmtu pakhat men a si. Phungning loin a cawlcang lo i, miphun a leirawitu zong a si lo. Nangmah le keimah ve bang  Political Party pakhat kha fek tein a dirkamhpi tu cu a si ve.

“A Tree That Bears Fruit Will Always Be Stoned.” Lai holh cun: “A thei arah deuhmi  thingkung cu lungcheh a tong khun,”  tiah hei let ko u sih. Adik, ahmaan, a phung  zong a si ko. A phur in phongh i, rocarter belte i tim hin hla u sih, tiah ka ruahnak ka vun langhter.

Kaa Lawm

By Paul C. Tha


NLD CEC nih Chinram NLD vote lemsoitu rian an khinhmi Dr. Sasa cu CNLD a dirkamhtu (An mintak le an konglam theih ngaingai lomi) hna nih online ah pumpak thangchiatnak cattial in an doh caah Paul C. Tha nih Dr. Sasa dirkamh in ca a hun ttial hi a si.

Catialtu CNF/A Secretary hlun Paul C. Tha cu CNF/A ah kum 32 chung ram ca ah nunpek rian a ttuan hnu ah May 2020 ah khan CNF/A in aa dinhnak kong zapi theih in a rak langhter.

Latest News

News in Burmese