Chinram Vanlawng Bual, University Le Cikha-Paletwa Lam Hi CNF Halmi an Si: MP Ni Sui Lian

| The Chin Journal | Hakha, Chin State

Atu NLD cozah chan Chinram chung ah Project ngan bikbik a simi le an ttuan cuahmahmi Surbung Vanlawng bual, Cikha-Paletwa lampi le University (Hakha) hi CNF nih an rak hal i tuah ding in U Thein Sein cozah nih bia a rak kammi an si, tiah Pyituh Hluttaw MP Pi Ni Sui Lian nih The Chin Journal he biaruahnak lio ah a chim.

“President Thein Sein cozah nih CNF he remdaihnak tuah ding in a rak hal hna lio ah hin CNF nih Laitlang ah vanlawng bual pakhatkhat cu rak kan tuahpiak tiah an rak ti. Khate kha a nung i, President Thein Sein chan ah an rak thawk. Atu NLD cozah nih MMK 37 billion dih in an vun peh i 2020 ah cun on ding in timhtuah a si,” tiah a chim.

“CNF le President Thein Sein cozah karlak ah hnatlaknak an rak ngeihmi cathluan pawl ka rel dih tik ah Hakha University, Vanlawng bual le Cikha-Paletwa lam hi cu President Thein Sein chan ah tuah ding in CNF sin ah biakamnak an rak pekmi hna a si. 2020 ah cun Hakha College zong hi University ah aa cang te lai,” tiah MP Pi Ni Sui Lian nih a chim chap.

A cunglei rian pawl a tlamtlin nakhnga Laitlang nulepa pawl zong fak piin an i zuam cio ko. Asinain, ahmasabik i lam a kan onpiaktu hi cu CNF an si ti hi keimah ka hmuhning a si, tiah pehzul in a chim.

Latest News