Chinram le Rakhine Karlak ah Chin MP U Hoih Tan a Tlau

| The Chin Journal | Hakha, Chin State

Paletwa peng mekuang No. 11 in Amyothar Hluttaw ah Chin palai rian a ttuan liomi U Hoih Tin cu Paletwa khua le Rakhine ramkulh, Kyaukdaw khua karlak ah Nov. 3 ah a tlau, tiah theih a si.

Nihin zinglei sml. 8:00 hrawng ah MP U Hoih Tin telh in Paletwa-Zorampui karlak lamcawh rian a tlaitu India rammi 4, holhlettu 2 le Speed Boat a mongtu minung 2 cu Kaladan tiva hrawn in Kyaukdaw lei ah an kal i lampi ah an zapi in an tlau.

MP U Hoih Tin hi Naypyidaw ah Amyothar Hluttaw meeting kai ding in aa thawhmi a si. U Hoih Tin telh in Speed Boat cung ah a ummi minung 9 an zapi tein an tlau i, AA hriamtlai hna nih an tlai hna hnga maw tiin thinphang in an um hna.

Sihmanhsehlaw, AA nih an tlaih hna le tlaih hna lo kong ah atu tiang thawngpang fiang a um rih lo.

Paletwa penguk zung nih a chuahmi thawngthanhnak

Paletwa peng uk zung zong nih thawngthanhnak a tuah i, MP U Hoih Tin telh in a tlaumi pawl hmuh an si nakhnga hlathlainak kawlhawlnak an tuah cuahmah.

MP U Hoih Tin te an i citmi Speed Boat hi chun sml. 12:00 hrawng ah Rakhine miphun pawl khua an saknak Kyaukdan khua pawng ah a hmutu an um. Asinain, atu zanlei sml. 6:00 tiang ah hmuh an si rih lo.

Chin ramkulh cozah chimnak nawlngei U Soe Htet nih, “Nihin zinglei sml. 10:00 ah Kyaukdaw ah a phan ding a si. A motor mongtu nih Kyaukdaw in a hngah peng nain zanlei sml. 4:00 tiang a phak lo caah a motor mongtu nih thawng a run kan thanh ve. Cu hnu ceo cun kannih zong nih kan theih,” tiah a chim.

Chin ramkulh cozah nih Ramkulh cozah, Myanmar ram runvennak zung le NRPC pawl ah thawngthanhnak zong a tuah cang, tiah theih a si.

Latest News