Chinram FDA nih Tu Kum ah Ngandamank Ca ah Tihnung a Simi Thilri Ting 40 Man Hrawng an Tlaih

| The Chin Journal | Hakha, Chin State

Chin ramkulh “Eidin le Sii-ai Tlaangtlatu Zung” (FDA) nih tu kum chung ah minung ngandamnak ca ah ttihnung a simi eidin, sii-ai le ttamhmoih thilri pawl ting 40 man hrawng an tlaih, tiah Chin ramkulh FDA zung in thawng kan theih.

Hi kong he pehtlai hin Chin ramkulh FDA zung ah Assistant Director a simi Dr. Joseph Van Bawi Uk nih January 2020 in atu tiang ah hin ting 40 man hrawng cu kanmah FDA nih kan tlaih cang, tiah a chim.

“Kan check tik ah hin committee in rian kan ttuan. Cu committee ah cun abikin kanmah FDA, uknak zung, palik zung le Sipin zung tibantuk pawl i bawm in check a si tawn. Atu kum chung ah Hakha lawng ah si loin Falam le Mindat zong telh in voi 12 kan check cang. January in atu tiang ah eidin awk le hman awk a ttha ti lomi sii-ai le eidin ting 40 man hrawng hi kan tlaih,” tiah Dr. Joseph Van Bawi Uk nih a chim.

COVID-19 zawtnak a um hlan khan cu thla khat voi 2 tibantuk in check a si nain zawtnak ruang ah ahlan ningkel in checknak an tuah khawh lonak kong zong a chim chap.

“Atu hi COVID-19 ruang ah ahlan bantuk in kan check kho lo. Ahlan ah cun thla khat voi 2 tiin thlatin in kan check tawn. Nizan kha Hakha ah kan check. Ni khat ah dawr 10 tibantuk in kan check tawn. Nizan kan check ah khan 250,000 man hrawng kan tlaih,” tiah a chim.

FDA nih an check bikmi cu eidin awk a ttha lo thilri, ttamhmoih le sii-ai pawl an si. Cu hna cu FDA zung nih thawngzamhnak le online zong ah zapi hmuhtheih ding in an fakthanh tawn. Cun, caan a luan cangmi thilri pawl zong an check hna.

Nizan Hakha dawr pawl an check lio ah tam bik an tlaihmi hna cu caanluan (Expired) eidin le thilri pawl an si.

FDA nih an tlaihmi thilri pawl hi Sipin ah ap a si i, Sipin nih phung he aa zul in cu thilri pawl cu an tawlrel tawn, tiah theih a si.

Latest News

News in Burmese