Chinram Chung Thilman Kaiter Lo Ding in Chin Cozah nih Nawlnak a Tuah

| The Chin Journal | Hakha, Chin State

Chin ramkulh, Tedim ah COVID-19 zawtnak a ngeimi minung pakhat hmuh a si bantuk in zawtnak ruang ah dawrngeitu hna nih thilman an kaiter lo nakhnga Chin ramkulh cozah nih March 24 ah nawlnak a tuah.

Chin ramkulh cozah nih konglam panga aa telmi Chin mipi sin bawmhalnak le nawlnak ca a chuah i “Mipi nih thinphang thlalau in an um nakhnga lo le thilman kai loin a um nakhnga rak kan bawm cio u,” tiah number pakhatnak ah an langhter.

Ramleng in a rak tlungmi an um a si ahcun a naih biknak ngandamnak zung ah thawngthanh i zuam ding in le lengchuah loin mahle innte ah ni (14) um i pakhatkhat damlonak ton ah cun ngandamnak zung ah thawngthanh ding in nawlnak a tuah chap.

Mibu in tuahmi pumhkhawmhnak pawl a si khawh chung hrial ding le chiatpang ton sual tik ah a si khawh chung in mi tlawm tein tuah i zuam ding in nawlnak an tuah chap fawn.

Cun, Ngandamnak zung nih a chuahmi fimchimhnak pawl le Chin ramkulh cozah nih a chuahmi zulhphung pawl ttha tein zulh i zuam ding zong in nawlnak an tuah chap.

March 24 zanlei ah Chin ramkulh cozah nih Hakha Chin Media hna he tonnak a ngei i, nihin ni in April 30 tiang Chinram chung ah a bu in zei bantuk pumhkhawmhnak hmanh tuah lo ding in nawl a chuah cang.

Khuapi, khuate, sang le veng chung ah acozah zung lei hruainak in tuah timhmi tonpumhnak le cawnpiaknak vialte zong April 30 tiang tuah lo ding in nawl an chuah.

Hotel, Motel le Guest House pawl zong ah vawlei lei siseh, biaknak lei zong siseh zei tonpumhnak hmanh tuah rih lo ding in nawl chuah chap a si.

Chin ramkulh chung college, High School le a dang private fimcawnnak sianginn hna zong nih fimcawnnak zungpi nih thawngthanhnak a tuah hlanlo sianginn on a ngah lai lo.

Chin ramchung KTV, Karaok dawr pawl khar viar ding le rawldawr ah parcel lawng in cawk ding in nawl chuah chap zong a si.

Khrihfa siseh, Buddhist siseh, acozah nih thawngthanhnak a tuah tthan hlan caan karlak chung ah zei bantuk pumhnak hmanh tuah rih lo ding in nawl an chuah chap.

COVID-19 kong ah thawngpang diklo a zamhtu cu upadi ning in dantatnak pek an si lai tiah Chin ramkulh cozah nih nihin March 24 ah nawl a chuah.

 

Latest News

News in Burmese