Chinram Chung COVID-19 Khamnak Sii Chunh Ding Cazin Lak Hram an Thawk

| The Chin Journal | Hakha, Chin State

COVID-19 zawtnak khamnak sii chunh dingmi pawl cazin laknak cu nihin thawk in Chin ramkulh chung hmun kip ah tuah hram an thawk, tiah thawng kan theih.

COVID-19 zawtnak khamnak sii COVISHIELD aa chun dingmi pawl cazin laknak hi thaizing tiang tuah a si lai.

COVISHIELD hi mizapi chunh awk a ttha lo. A tanglei minung pawl hi cu COVID-19 khamnak sii chunh lo ah a ttha an ti hna:

  • Hnuk ding lio nauno a ngeimi hringtu nu hna le naupawi lio hna
  • COVID-19 zawtnak a ngeimi hna
  • COVID-19 Zawtnak an ngei kho tiah lunghrinhmi hna
  • COVID-19 zawtnak in a damnak ni 14 a tling rih lomi hna
  • Kum 18 tang mino hna

Cun, Organ Transplant aa tuahmi hna, HIV/AIDS zawtnak a ngeimi hna le minung takpum thazaang a dertertu sii/ritsii a hmangmi hna cu COVID-19 kham sii i chunh hlan ah sibawite sin ah ruahnak ttha tein lak a herh.

Chin ramkulh ca ah an timhtuahmi COVID-19 khamnak sii cu nihin ah Yangon in Kalay ah an phorh i a rauh hlan ah Chinram ah a phan lai.

COVID-19 khamnak COVISHIELD hi Chin ramkulh ca ah dur zeizah a phak lai timi belte fiang in theih a si lo.

COVID-19 zawtnak dohnak ah hmaisuang in rian a ttuantu ngandamnak lei rianttuantu pawl chunh hmasa ding in timhtuah a si.

Cun, ramhruainak rian tluang tein a kal khawh nakhnga acozah bu chungtel hna le cozah zung kip luban deuh pawl hi COVISHIELD chunh hmasa an si ve lai, tiah an timhtuah.

Latest News

News in Burmese