Chinram ah Zei Hriamtlai Hmanh Keethlak Lo Ding le Kahdohnak Ngol Ding in CNF nih Hal

| The Chin Journal | Hakha, Chin State

Chinram chung ah zeibantuk hriamtlai hmanh nih ral lei cawlcanghnak tuah lo ding in le atulio AA le Kawl ralkap kahdohnak arianrannak in ngol ding in CNF nih March 19 ah cathanh chuah in halnak a tuah, tiah theih a si.

Thantlang peng, Camp Victoria ah March 16-19 tiang CNF a voi 7nk tonpumhnak an tuah i, nihin a donghnak ni ah cathanh an chuah hi a si.

An cathanh ah Chin miphun hna mahte tawlrelnak nawl kan ngeih khawh nakhnga, Democracy le miphun i rualrannak kan hmuh nakhnga le Federal rampi dirh a si nakhnga timi ramkhel lei tlaihtleng le timhmi hi kan i hmaithlak, tiah an langhter.

Cun, atulio ah a cangmi AA le Kawl ralkap kahdohnak ah Chin miphun hna cung ah ralram sualtuahnak (War Crime) pawl an tluntermi a um caah atulio Chin miphun kan caah abiapi tukmi caan a phan cang tiah kan ruah. Cucaah, Chinram chung ah zei bantuk hriamtlai hmanh nih ral lei cawlcanghnak tuah lo ding in le AA le Kawl ralkap kahdohnak ngol ding in kan in nawl hna, tiah an langhter.

Atutan CNF tompumhnak ah aiawhtu minung 151 an kai kho i, hruaitu thar thimnak zong an tuah.

CNF Chairman ah Pu Zing Cung, Vice Chairman (1) ah Pu Thang Ning Kee, Vice Chairman (2) ah Dr. Lian Hmung Sakhong, Vice Chairman (3) ah Dr. Sui Khar; General Secretary ah Salai Thla Hei, Assistant General Secretary (1) ah Salai Ram Kulh Cung, Assistant General Secretary (2) ah Salai Htet Ni le Assistant General Secretary (3) ah Pu HC. Ral Hnin an thim hna.

Latest News

News in Burmese