Chinram ah Lam Rian a Rak Tuanmi Pa Nih Kum (9) Ngakchia Nu a Tlaihrem

| The Chin Journal | Hakha, Chin State

Chin ramkulh, Tongzaang peng ah lam rian a tuanmi Kawlpa Bo Win (kum 27) nih aa thumhnak inntek hna i kum (9) lawng a si rihmi an fanute a tlaihrem, tiah theih a si.

July 22 zinglei sml. 4:00 hrawng ah hi thil a can hi a si i, mah lio caan ah hin ngakchia nute nulepa hi Kalaymyo ah an kal lio a si.

Inn ah kum (12) a simi ngakhia pa, tlaihrem a tongmi kum (9) nute le kum (6) a simi ngakchia nute lawng an um.

Tlaihrem a ton hnu a thaizing ah nanmah he chungkhat a simi kum (19) nungak nih ngakchia nute a umtu a zoh i a lunghrin tik ah thil sining a hal.

Ngakchia nute nih tlaihrem a tonnak kong cu a chimh. Ngakchia nute nulepa an rak tlung i thil sining vialte cu kum (19) nu nih cun a chimh hna.

Mah lio caan ah hin Bo Win timi pa cu motor pakhat in Kalay lei ah a zaam. Sihmanhsehlaw, July 22, zan sml. 11:00 ah Tedim lonh ah an tlaih khawh.

Bo Win cu kumtlinglo tlaihhrem sualtuahnak pohma 376 in Tonzaang peng palik zung ah case an on i an hren.

Kum (9) ngakchia nute a tlaihremtu Kawlpa hi Mandalay ramthen, Tharsay peng khuate in Chinram, Tonzaang ah lam rian a rak tuanmi a si.

Aluancia 2018 kum thawk lei zong ah khan Hakha ah cozah zung rian a tuanmi Kawlpa nih a umnak Laimi hna i an fapa a rak tlaihrem i tazacuai a tong.

Cu pa cu Hakha peng biaceih zung nih kumtling ngakchia tlaihrem sualnak na tuah tiah a sualnak a hmuh i kum 20 thongthlak ding in dan a tat i, Kalaymyo thonginn ah an kuat, tiah theih a si.

Latest News